Кеси хазналарыбызны сакълауну къыйматлы амалларын излегендиле

Шимал Кавказны муслийман биригиулерини къуллукъчулары, власть органланы келечилери бла студентле Нальчикде дин биригиулени тёрели россейли адеп-къылыкъ ниетлени жайыуну мадарларыны юсюнден сёлешир ючюн «тёгерек столгъа» жыйылгъандыла. Аны КъМР-ни Муслийманларыны дин управлениясы Ислам культурагъа, илмугъа бла билим бериуге себеплик этиу жаны бла фондну эмда Шимал Кавказны Муслийманларыны координация арасыны болушлукълары бла къурагъанды. 

Жыйылыугъа КъМР-ни Жамауат палатасыны башчысы Хазраталий Бердов, Парламентни Председателини орунбасары Мурат Карданов, миллетлени ишлери эмда жамауат проектле жаны бла министр Анзор Курашинов, Ислам культурагъа, илмугъа эм билим бериуге себеплик этиу жаны бла фондну башчысы   Михаил Грязнов эм башхала къатышхандыла.

Ишни башлай, КъМР-ни Муслийманларыны дин управлениясыны башчысы Хазраталий  Дзасежев Россейде миллет тёрелени,  намысны, юйюрню магъанасы не заманда да кючлю болгъанларын эсгертгенди. Жамауатны айнытыуда динни магъанасыны юсюнден айта, ийман адамны тазалыкъгъа, ариулукъгъа талпындыргъанын белгилегенди. Арт кезиуде къыралда миллет тёрелени,  намысны, культураны сакълаугъа энчи эс бурулгъанын,  бу ишге  власть органла бла бирге жамауат да тири къатышханын чертгенди.  

– Бу соруула магъаналарын тас этмейдиле. Бизге къажау тургъан къыралла миллет тёрелеге келишмеген, тыш, бизни ич дуниябызгъа ушамагъан адеп-къылыкъны сингдирирге кюрешедиле. Алагъа къажау барыбыз да бирча турургъа борчлубуз, жамауатны терс ыздан жаланда алай бла сакълаяллыкъбыз,– дегенди муфтий.

Аны оюмуна кёре, муслийманланы жамауатны аллында жууаплылыкълары уллуду,  террористлени бла экстремистлени атларын букъдурмай, ачыкъ этерге керекди.  

Жыйылыуну баш муратыны юсюнден айта, Хазраталий Олиевич миллет адет-тёрелеге, намысха, адеп-къылыкъгъа юйретиуню   мадарлары бютюн къыйматлы болурча этерге кереклисин чертгенди. Бу ишде дин биригиулени бла къыралны жууаплылыкълары уллуду деп,  аны бла бирге    окъутуу-методика эм информация материалла жарашдырып, аланы жаш тёлюге юлеширге кереклисин да чертгенди.

Михаил Грязнов а муслийман дин къуллукъчуланы жаш тёлюню юйретиуде, ала бла байламлыкъла къурауда сынаулары уллу болгъанын чертгенди. «Дин биригиулерибиз россейли тёрели жамауатны сакълауда уллу иш толтурадыла. Либералла сингдирирге кюрешген осал къылыкълагъа хорлатыргъа жарарыкъ тюйюлдю. Аладача, атаны бла ананы орунуна «биринчи номерли ата-ана», «экинчи номерли ата-ана», деп жазаргъа, сабийле уа кеслерин ким болгъанларын ангылаялмай тургъан кезиуле бизге ахырда келишмейдиле»,-дегенди ол.   

Тюбешиуде власть органланы келечилери, регионланы муфтийлери да сёлешгендиле. Ала  радикал ниетлиле жамауатха не къоркъуу салгъанларын эсгертгендиле, динлени бла миллетлени араларында хайырлы байламлыкъланы къурауну, бу ишде  билимлери болгъан кадрла хазырлауну, тийишли методикала жарашдырыуну дурус кёргендиле. Дагъыда совет заманланы  юйретиу жаны бла ахшы амалларын хайырланыргъа  кереклисине да эс бургъандыла. 

Жыйылыугъа къатышханла дин къуллукъчуланы тёрели россейли хазналаны сакълау жаны бла къырал политикагъа тутхучлукъ этгенлери – ол миллетлени бла динлени араларында келишиулюкню кючлеуге уллу къошумчулукъ болгъанын, иймамла ууаз бергенде, динде зорлукъ болмагъаныны, ол ариулукъгъа, тазалыкъгъа чакъыргъаныны, радикал ниетле аны жорукъларына келишмегенлерини юслеринден айтсала, ол да хайырлы боллугъун белгилегендиле. 

Интернет ёсюп келген тёлюню акъылына, оюмуна этген басыулукъну эсге алып, халкъда хурметлери уллу болгъан дин къуллукъчула бла къысха роликле жаздырып, аланы социал сетьледе жаяргъа деп, аллай башламчылыкъ да этилгенди.