Жамауат къараучула айырыулагъа хазырдыла

Къабарты-Малкъарда 8 сентябрьде боллукъ айырыулада 700-ден аслам жамауат къараучу ишлерикдиле, деп билдиредиле Жамауат штабны пресс-арасындан.

Жамауат къараучуланы къауумуна башха-башха усталыкълада уруннган адамла – устазла, юйретиучюле, предпринимательле, волонтёрла, студентле, пенсиячыла киредиле. Ала барысы да айны ичинде юйрениулени ётгендиле, айырыулагъа хазырланыу ишле республиканы битеу 13 районунда да тамамланылгъандыла, анга себепликни муниципал жамауат палатала да этгендиле. Юйретиу программаны «Жалынчакъсыз жамауат мониторинг» ассоциация бла Россейни Жамауат палатасы жарашдыргъандыла. Семинарланы регионда преподавательлени къаууму – регион жамауат организацияланы келечилери, илму ишчиле, педагогла - бергендиле, ала кеслери да ары дери Пятигорскда дерслеге жюрюгендиле.

Жамауат къараучула, штабны башчысы Николай Маслов айтханыча, теория жаны бла алгъанларындан тышында, билимлерин иш юсюнде да сынагъандыла, айырыучу законодательство бла шагъырейленнгендиле, алагъа къаллай эркинликле берилгенини эм къаллай борчла салыннганыны, сакъланмагъан неда даулашлы болумлада не этерге кереклисини юсюнден билгендиле. Хар бирине окъуудан сора жамауат къарауну «Алтын стандарты» берилгенди, аны болушлугъу бла ала этген оноулары федерал эм регион законодательствогъа келишгенине бла къалгъанына къараяллыкъдыла.

Хар жамауат къараучу «Жалынчакъсыз жамауат мониторинг» ассоциацияны федерал порталында эсепге салыннганды, ала идентификацияны ётгендиле, экзамен бергендиле, битеуроссей жарауланы кезиулеринде сынау айырыу участкаладан НОМ порталда «Сообщенияланы картасына» билдириуле жиберип кёргендиле. Муниципал къуралыулада ишлерин къараучуланы къауумлары жыйышдырыладыла, аланы бригадирлери боллукъдула, республикабызда саулай да 18 бригадир ишлерикдиле. Жамауат къараучуладан 4-лен тюрмеледе ишлерикдиле – МВД-ны регионда бёлюмюню, УФСИНН-ни эм айырыучу комиссияланы келечилери бла бирге ала следствие изоляторда, тюзетиучю колониялада, аманлыкъчыла болжаллы халда тургъан изоляторлада, энчи приёмникледе бла Саулукъ сакълау министерствону психоневрология диспансеринде боллукъдула.

Алай бла айырыулагъа хазырланыу энчи эсепдеди, Жамауат палатада къуралгъан жамауат штаб анга тири къатышады.