Школла жангы окъуу жылгъа къалай хазыр болгъанлары сюзюлгенди

«Единая Россия» тамамлагъан «Сабийни школгъа хазырла» жандауурлукъ ишни эсеплери чыгъарылгъандыла эмда къыралда билим бериу учрежденияланы жангы окъуу жылгъа хазырлыкълары сюзюлгенди. Партияны битеуроссей штабыны жыйылыуунда белгили этилгенича, битеу да бирге школ керекле бла 240 минг сабий жалчытылыннганды. Депутатла, жамауатны жанындан да контроль  къатыланнганыны хайырындан а школланы къурулушларын эмда тынгылы жангыртыу жумушланы заманында бошаргъа онг болгъанды.

Партияны генсоветини секретарыны къуллугъун толтургъан   Владимир Якушев айтханыча, школланы тынгылы жангыртыу программаны чеклеринде 2022 жылдан бери 4,5 минг мекям хайырланыргъа берилгенди, ол санда быйыл – 406.

- Депутатла, сенаторла, жамауат контрольну штабларыны келечилери болжаллары кеч къалгъан жерлеге бютюнда уллу эс бургъандыла. Аны хайырындан тийишли жумушла толтуруп, кёрюмдюлени игилендирирге къолдан келгенди.  Быйыл сентябрь-декабрь кезиуде энтта 327 школда тынгылы жангыртыу ишле бошаллыкъдыла,-дегенди Владимир Якушев.

 Аны айтханына кёре, Президентни башламчылыкъларыны чеклеринде 1,3 минг школну  болжалдан алгъа ишлетирге мурат барды. «1-2 сентябрьде 132  школ сабийлеге эшиклерин ачхандыла. «Билим бериу» миллет проект башланнган кезиуден бери  уа 1,3  минг мекям ишлетилгенди.  Жылны ахырына дери энтта 154 школну къурулушу бошаллыгъына ышанабыз»,-деп къошханды партияны келечиси.

Владимир Якушев «Сабийни школгъа хазырла» акцияны юсюнден да айтханды. Аны чеклеринде кёп сабийли, къолайсыз юйюрлеге окъуу жылгъа хазырланыргъа болушлукъ этиледи. Быйыл аны 240 минг сабий алгъандыла. Аладан 63 минги – жангы регионлада жашайдыла.

Партияны депутатлары  5,5 минг сабийге болушхандыла. «Родительская приёмка» акциягъа уа 13 минг ата-ана къатышхандыла. Ала муниципал комиссияла бла бирге 6 минг школну сюзюп, ала окъуу жылгъа къалай хазырланнганларын ачыкълагъандыла.

Жарыкъландырыу министр  Сергей Кравцов, ушакъгъа къатыша, партия тамамлагъан контрольну хайырындан къошакъ  халда энтта мингден аслам объектни тынгылы жангыртыргъа онг болгъанын билдиргенди. 

Алай жетишимле бла бирге кемчиликле да бардыла. Ол школланы ишлетиу эм тынгылы жангыртыу программалада белгиленнген болжалладан артха къалгъан регионланы ачыкълап, октябрьде селектор кенгеш бардырыргъа, анда кемчиликле энтта болсала, аланы тамамлауну амаларын белгилерге башламчылыкъ этгенди.

КъМР-ни Парламентини Билим бериу, илму эм жаш тёлюню ишлери жаны бла комитетини башчысы, «Жангы школ» партия проектни регионда толтуруугъа жууаплы Нина Емузова   KABARDIN-BALKAR.ER.RU сайтха билдиргенича, КъМР-де партияны халкъ программасыны чеклеринде 2024-2025 жыллада 13 школну тынгылы жангыртыргъа борчла салыннгандыла.

- Аладан алтысын бир жылны ичинде тамамларгъа керекди, къалгъанлары эки жылгъа белгиленнгендиле. Конкурс документле барысы да хазырдыла, тийишли ишле жетисинде башланнгандыла,-дегенди Нина Емузова.

Битеу да бирге уа 2022-2024 жыллада республикада 19 школ ишлетилгенди,  алада 11,4 минг окъуучугъа жерле къуралгъандыла. Ол санда былтыр 6 школ битдирилгенди. 2022 жылдан бери тынгылы жангыртыу жумушла 60 объектде тамамланнгандыла, быйыл  а – 13-сюнде. 2026 жылгъа дери  регионда энтта 57 билим бериу учрежденияны мекямы тап халгъа келтирилликди, деп чертгенди Нина Емузова. Битеу бу жумушла уа окъутууну къурау, кадрла бла жалчытыу  жаны бла жангы борчла салады, деп къошханды ол.