Ал жерде – социал магъаналы соруула

Къабарты-Малкъарны Регионнга оноу этиу жаны бла арасы (ЦУР) бир ыйыкъны ичинде 700 соруугъа къарагъанды. Ол республиканы инсанлары бла власть органланы арасында байламлыкъны жалчытырча эм чыкъгъан соруула къысха заманда тамамланырча ишни тири бардырады. Аланы кёбюсю социал сетьледе «Telegram», «Однаклассники», «ВКонтакте» кётюрюлген «Инцидент-Менеджмент» системаны амалы бла жарашдырылгъан сорууладыла. 

Сагъынылгъан сорууланы кёбюсю, хар замандача, социал къоруулау, жашау журт-коммунал мюлк, тийрени игилендириу, жолланы тапландырыу, саулукъ сакълау эм башха соруула бла байламлыдыла. Аланы хар бирине специалистле тынгылы къарап, профильлерине кёре тийишли ведомстволагъа билдиредиле.

Бу жол тарыгъыуланы асламысы Нальчик шахар округда, Урван бла Чегем районлада жашагъанладан келгенди. Алгъа заманда жууап берилирча иги кесек заманны сакъларгъа тюшгенди. Энди уа, орта эсеп бла алып айтханда, бир сагъатдан  кёпге созулмагъаны ишни бютюн жетишимли бардырыргъа онг тапдырады.  

Алай бла, жети кюнню ичинде специалистле жууаплы ведомствола бла бирге Къашхатауда Мёчю улу, Псыхурейде Клиническая бла Сижажева орамлада арбазлагъа таза суу барырча этгендиле. Черная Речка элде да суу сакъланнган эм аны басымы бла жиберген темир башнягъа къаралгъанды. Аны хайыры бла иги кесек адам таза суу бла сылтаусуз болгъандыла. 

Басханда Ленин атлы проспект бла Победы орамлагъа тынгылы ремонт этилгенди. Акъ-Сууда да Ольховая орамда кече жарыкъ болурча чыпынлагъа токну аягъан чыракъла салгъандыла. 

Андан сора да, ЦУР «Жарсытхан соруула» рубриканы чеклеринде Терк районну администрациясыны башчысы Асланби Хуштов бла тюзюнлей эфир ётдюргенди. 

Къонакъ федерал проектлени бардырыуну: ол санда жолланы жангыртыуну, таза суу бла жалчытыуну, мектеплеге, сабий садлагъа тынгылы ремонт этиуню, жамауат аслам хайырланнган жерлени, кёп фатарлы юйлени арбазларын игилендириуню эм башха сорууланы юсюнден  хапарлагъанды. 

Эсге сала айтсакъ, Регионнга оноу этиу ара офис халда ишлемейди, «Инцидент-Менеджмент» бир тюрлю соруугъа эс бурурча, ол социал сетьлени биринде жазылыргъа керекди, соруу да тынгылыракъ ачыкъланса игиди.