Арктика регионну келечилерине сейирлик жолоучулукъ

Орус география обществону (РГО) регионлада бёлюмлерини араларында байламлыкъла жюрютюуню чегинде Къабарты-Малкъарда Ненец автоном округну кюнлери бардырылгъандыла. Аланы муратлары Шимал Кавказда жашагъанланы Арктика регионну энчиликлери бла шагъырейлендириу эди.

Республикабызгъа жолоучулукъ къонакълада белгиленнген Кийикчини кюню бла бир кезиуге да тюшгенди, анга жораланып, округда жашагъанланы турмушларыны, маданиятларыны юсюнден, бузлагъан тенгизлени, табийгъатны суратлагъан «Кочуй. Живи. Люби» деген аты бла Нарьяр-Мардан Виктор Куликовну кёрмючю да къуралгъанды. Ненец автоном округну кюнлерин ачыугъа уа республиканы курортла эм туризм министрини орунбасары Асланби Шхагапсоев да къатышханды. Жыйылгъанланы алгъышлай, ол Къабарты-Малкъарны миллетлерини эм Орус география общество бла бирге ишлеуню юсюнден айтханды, аны майданында регионла бирикгенлерин, жаш тёлю бир бирин таныгъанын, башха сынамны кёрюрге онг чыкъгъанын да чертгенди.

Жолоучулукъну чегинде РГО-ну Къабарты-Малкъарда бёлюмюню башчысы Аксана Карашева бла Ненец округда бёлюмюню башчысыны орунбасары Алина Андриянова байламлыкъ жюрютюуню юсюнден келишимге къол да салгъандыла. Анга кёре эки субъектде да бир бирлерини турист жолоучулукъларыны юслеринден жамауатха билдирирге, маданият эм экология туризмни айнытыргъа, география хазнаны тинтирге белгиленеди. Ызы бла ненец тёрелени юслеринден «Дети Долгого озера» деген фильм кёргюзтюлгенди, анда «Ямб то» тукъум тайпаны сабийлерини, аланы тундрада жашауларыны, ёз маданиятларын сакълагъанларыны, тёрелени тёлюден тёлюге къалай ётдюргенлерини юсюнден хапарланады. Къонакълагъа уа дагъыда республикабызны ариу жерлерине эсде къалырча жолоучулукъла къуралгъандыла.