Ичи, тышы да жангыртылгъандыла

Черек районну Къара-Суу элинде орта школ жангы окъуу жылгъа  тынгылы хазырланып тюбейди, дерге боллукъду.  

– Биз, хар замандача, кабинетлени, коридорланы бояллыкъ, сюртюллюк жерлерин  жангыртханбыз, мекямны тыш къабыргъаларын да тап халгъа келтиргенбиз, тёгерегин хансдан тазалагъанбыз, – дейди мектепни директору  Айшаланы Муратны  жашы  Мухадин.

– Школ 1959 жылда ишленнгенди, андан бери анга тынгылы ремонт этилмегенди. «Районну оноучулары келир жыл аны жангыртыуну къолгъа алыргъа айтадыла. Сёзсюз, терезелери, эшиклери, сантехника, электрика, дагъыда кёп башха затла да тозурапдыла, ала алышындырылсала, бек иги боллукъду», – деп къошады ол.

Окъуу юйде «Точка роста», химия, физика, биология, ана тилден, башха предметледен да кабинетле бардыла. Ала барысы да керекли затла бла жалчытылыныпдыла. Компьютерлени бир кесеги да жангылагъа озгъан окъуу жылда алышдырылгъан эдиле. Устазла да жетишедиле аланы 80 процентини – бийик, къалгъанларыны да энчи билимлери бардыла.

Быйыл школгъа элли тёрт жаш бла къыз келликдиле. Сабий садха да онтогъуз бала жюрюп башларыкъды.  

Сабийлени азлыгъы директорну бек уллу жарсыуларындан бириди. «Аны сылтауларындан бири - жаш тёлюню, иш болмай, элден кетип баргъаныды. Бюгюнлюкде элде жыйырма беш юй адамсыз сюеледи», – деп, мудахланып айтады ол.