Болушлукъ биринчи кюнден окъуна къуралгъанды

 «Единая Россия» Курск областьха 800 тонна жандауурлукъ жюк жетдиргенди. Партия   юйде керекли техника, аш-суу, кийимле эмда бузулгъан журтланы ишлетирге къурулуш материалла келтиргенди.

Партияны генсоветини секретарыны башчысыны къуллугъун толтургъан Владимир Якушев Курск областьха жолоучулугъуну кезиуюнде айтханыча, жандауурлукъ жюкню жыяргъа «Единая Россияны» 60-дан аслам регион бёлюмю къатышхандыла.

Регионну башчысыны къуллугъун толтургъан Алексей Смирнов бла бирге Владимир Якушев жандауурлукъ жюклени жыйышдырыу эм юлешиу пунктланы ишлери бла шагъырей болгъанды, шёндю артыкъда къаллай затла керек болгъанларын сурагъанды.

- Партияны башчысы Дмитрий Медведев Курск областьда болумну сюзюуге аталгъан видеоконференцияны кезиуюнде регионда адамлагъа болушлукъну соруулары къысха заманны ичинде тамамланыллыкъларын айтханды. Бизни ол жаны бла битеу онгларыбыз бардыла, - дегенди Владимир Якушев.

Областьда атышыула баргъан жерледен къачханла тургъан эки жерге холодильникле, микровольновой печьле, сабийлеге уа тахта кёгетле бла татлы ашарыкъла келтиргенди партияны къуллукъчусу. 

- Быллай жерледе адамлагъа тап болумла къуралырча, ала къыйналмазча битеу мадарла этилгендиле. Кемчиликлени, жетишмеген затланы терк окъуна кетерирге кюрешебиз. Волонтёрланы болушлукълары артыкъда магъаналыды. Бюгюнлюкде Курск областьда «Жаш гвардияны» бла «Волонтёр ротаны» 70 келечиси бардыла. Ала адамланы ашырадыла, алагъа жандауурлукъ жюклени юлешедиле. Мында къыралны битеу жерлеринден волонтёрла бардыла – Россейни юг жанындан башлап Узакъ Востокга дери. Аланы санына хар кюн да къошулгъанлай барады,-деп белгилегенди Владимир Якушев.

Курск областьны инсанлары болушлукъну партияны жамауат келечилерини штабында да алаллыкъдыла. Алагъа къырал чекни тийресинде жашагъанла келедиле асламында, деп чертгенди Владимир Якушев.  

Областьха медицина керекле да жетдириледиле. Партияны генсоветини башчысы клиникалы больницагъа рацияла, тюрлю-тюрлю техника, аш-суу да келтиргенди.

Магъаналы сорууладан бири – атышыула баргъан жерледен мамыр адамланы чыгъарыуду. Партияны къуллукъчусу билдиргенича, жандауурлукъ жюкню юлешиу пунктлагъа адамланы къутхарыугъа эки машина берилгенди, жууукъ кезиуде уа энтта онусу келтирилликди. 

Владимир Якушев «Единая Россия» мындан ары да Курск областьны халкъына болушханлай турлугъун чертгенди. «Биз ВСУ атышыуну башлагъан биринчи кюнден адамлагъа себепликни къурагъанбыз. Къыралны битеу субъектлеринде да Курскдан келгенлеге волонтёрла тюбейдиле, жашау журтла табаргъа, керек болса, саулукъларына къаратыргъа бошуладыла. Жамауат эм жандауурлукъ организацияла уа курскчу сабийлени солууларын къурайдыла»,-дегенди ол.

«Единая Россия» 7 августдан Курск областьха аш-суу, дарманла, юй керекле, адамла болжаллы халда тургъан жерлеге генераторла, терк медицина болушлукъ машиналагъа оборудование, башха керекле жетдиргенди.  

Къабарты-Малкъар а Курск областьха юч жандауурлукъ жюк къурагъанды, деп билдиргенди   KABARDIN-BALKAR.ER.RU сайт. аны юсюнден партияны регион бёлюмюню секретары, КъМР-ни Башчысы Казбек Коков телеграм-каналында былай жазгъанды: «Курск областьны халкъына андан ары болушабыз. Бу кюнледе ючюнчю жандауурлукъ жюк (20 тонна) болушлукъну юлешиу пунктха жетдирилгенди.

Курск областьны оноучулары бла байламлыкъдабыз. Къабарты-Малкъар къаллай болушлукъ эталлыкъ эсе да, хазырбыз. Керек болса, федерал ведомствола бла келишип, бизни медикле бла къурулушчула да жерине барып ишлерикдиле»,-деп жазгъанды республиканы оноучусу.

Аны аллында уа КъМР-ден Курск областьха 40 тонна жандауурлукъ жюк ашырылгъанды, ол санда суу, ашарыкъла, жашау этерге керекли затла.