Партияланы жанындан тарыгъыула жокъдула

Бюгюнлюкде республиканы Парламентине депутатланы айырыугъа хазырланыу къыстау барады. «Политика партияланы юслеринден» федерал законнга тийишлиликде айырыулагъа къатышыргъа эркинликлери 25 партияны барды. Бизни республикада айырыулада алты партияны келечилерини кандидатуралары кёргюзтюлгендиле: «Единая партиядан» - 118, КПРФ-ден – 68, ЛДПР-ден – 47, «Новые люди» партиядан – 43, «Справедливая Россия – Патриоты – За правду» партиядан – 41 эм «Зеленыеден» - 40. 70 депутат мандатха – 357 инсан болады. Айырыуланы къураугъа регионну Айырыучу комиссиясы, 13 жер-жерли эмда 355 участка айырыучу комиссия, республикада жашагъан да 540 мингден аслам адам къатышырыкъдыла.

 Айырыула бузукълукъсуз ётерлерине жууаплы Жамауат штаб жыйлыуунда экспертле – республиканы Жамауат палатасыны келечилери, жамауат ишчиле, студентле – Демократия проблемаланы эм политика болумну тинтиу фондну докладына кёре кеслерини оюмларын да билдиргендиле. Штабха башчылыкъны палатаны кечиси Николай Маслов этеди. Ол билдиргенича, айырыула къалай ётгенлерин эсепде жамауат къараучула тутарыкъдыла, бусагъатда штабда алагъа юйретиуле къуралгъандыла.

- Районлада айырыучу участкалада тогъуз жюзге къараучу турлукъдула. Андан тышында, сайлау ётген кюн Жамауат къарауну арасы бла «исси телефон» да ишлерикдиле, экспертлени мобил къауумлары, керек болса, участкалагъа барлыкъдыла. «Жамауат къараучуланы араларында эндиге дери болгъан айырыулада ишлегенлени саны жетмиш процентге жетеди. Аланы асламысы социал жашаугъа тири къатышхан, къол кётюрюу ачыкъ эмда бузукълукъсуз ётерине къайгъыргъан адамладыла, - дегенди ол.

Партияла федерал даражада салыннган борчланы тамамлаугъа, регионлада эм муниципалитетледе чыкъгъан проблемаланы да тамамлаугъа бирча эс бёледиле, дейди «Городские электрические сети» акционер обществону генеральный директору Роман Литвинов.

Ол чертгенича, властьны бла жамауатны кючлерин бирикдириу айырыу кампанияла бийик даражада ётерлерине себеплик этерикди. Андан сора да, эксперт бу ишге Къабарты-Малкъарда къыралны жангы регионларындан келип жашагъанланы да къошаргъа чакъыргъанды. Бусагъатдагъы жорукълагъа кёре хар инсанны жашагъан жеринде сайлау этерге эркинлиги барды, деп къошханды ол.

Штабны эксперти юридический илмуланы кандидаты Къараланы Расул а къол кётюрюуню кюнюне хазырланыу законну чегинде бардырылгъанын айтханды. Ол билдиргеннге кёре, айырыучу комиссияда къырал телерадиовещание каналлада хакъсыз эфирге заманны юлеширча, бюллетеньде партияланы атлары бла белгилери тизмеде къаллай жерлени аллыкъларын белгилерча чёп атыу болгъанды. Бюгюнлюкге политика партияланы жанларындан тарыгъыула келмегендиле.