Ипотеканы азайтыргъа амал бармыды?

РФ-ни Ара Банкы озгъан айда ключевой ставка деген кёрюмдюню тюрлендиргенди. Ол ары дери да хазна аз тюйюл эди, энди уа онсегиз процентге жетгенди. Адамлагъа бир жаны бла аны неси игиди десегиз – банклагъа ахча салгъанда, ала кёбюрек процент тёлегенлери бла. Алай бу оноуну башха жаны уа алай аламат тюйюлдю. Нек дегенде кредитлени, ол санда ипотеканы да, багъалары уллуракъ болгъанды. Алай эсе уа, ипотеканы азайтыр амал бармыды? Роскачествону финанс экспертиза арасыны келечилери бередиле анга жууап.

Шёндюгю болум

Айтханыбызча, бюгюнлюкде Ара Банкны ставкасы 18 процентди. Тинтиулеге кёре, жангы ишленнген юйледе фатарлагъа ипотеканы тёлеую 19-20 процентден башланады.

Эсигизде эсе, льгота ипотеканы болжалы чыкъгъанды. Юйюр, Арктика, Узакъдагъы Восток эмда IT ипотекаланы излемлери уа тюрленнгендиле. Алагъа тюбеген эмда кредитлени бериу излемле кючлюрек болгъанын кёрген адамла тёлеуню азайтыр амалланы излейдиле. Аны этерге къолдан келликмиди? Хау. Алай ставканы иги да азайталлыкъ тюйюлсюз – аны да билип къоюгъуз.

Поручитель келтирирге неда залог мюлк къояргъа

Экинчисини орунуна жеринден тепдирилмеген мюлкню, улоуну, багъалы къагъытланы къояргъа жарайды. Алай билип къоюгъуз: быллай мюлкню саталлыкъ тюйюлсюз, ипотеканы тёлемей къойсагъыз а, ол банкга кёчерикди.

Поручительге да бек уллу излемле бардыла: тёлер онгу, иги кредит тарыхы. Баш излемле уа быладыла: жыл саны 70-ге дери, Россей Федерацияны инсанлыгъында туруу. Процент ставканы неллай бирге азайтыргъа боллугъун хар банк да кеси тергеп билдирликди.

Иш хакъыгъызны банкны карточкасына алыгъыз

Алай этер ючюн ишде аллындан окъуна заявление жазып, хакъыгъызны ол ипотеканы аллыкъ банкны карточкасына кёчюрюрча этерге тийишлиди. Мында да кредитни багъасын хар кимни да болумуна энчи къарап, алай белгилерикдиле. Аны бир бек азайтырыкъларын а сакъламагъыз: банкла аны бир процентден кёпге хазна тюшюрмейдиле.

Терк оноу этигиз

Инсанла жашау журт кредитлени теркирек жарашдырсала сюедиле банкла. Кёбюсюнде анга бир ай керекди. Аны этгеннге ставкасын 0,5 процентге азайтыргъа боллукъдула. Регистрацияны электрон халда ётгенлени да онгдурургъа боллукъдула.

Бир кезиулю комиссияны сатып алыгъыз

Бир-бир банклада комиссияны сатып алыу жумуш барды. Башхача айтханда, инсан ол кредитни бир кесегин (1-4 процентин) олсагъат тёлейди, банк а анга кредитни учузуракъ багъасы бла береди. Алай аны этерден алгъа тергеп, ол сизге хайырлы болурму, деп иги сагъыш этигиз. 

Къошакъ страховканы жарашдырыргъа

Банк, сёз ючюн, жашауну неда фатарны (къолдан сатып алынырыкъ) страховкасын этдирирге боллукъду. Аны дурус кёргенлеге уа ипотеканы учузуракъ багъасы бла бериучюдюле.

Биринчи тёлеуню уллуракъ этерге

Бу амалны хар банк да бирча бермейди. Бир-бирлери ол тёрени къойгъандыла. Алай башхалары уа ипотеканы 1,5 процентге дери азайтыргъа боллукъдула. Аны ёлчеми биринчи тёлеуню уллулугъуна кёре болады.

Бирле гитче кредитле алып, ипотеканы ма былай азайтыргъа кюрешедиле. Аны да оздурургъа керек тюйюлдю. Нек дегенде бирлерин заманында тёлеялмай къалсагъыз, кредит тарыхыгъыз бузуллукъду.

Къурулушчуладан субсидия алыргъа боллукъду

Алай этерге амал болса, организация банкга ипотеканы бир кесегин кеси тёлейди. Ол не бла тапсыз болургъа боллукъду: фатарны багъасы ол тёлеу тенгли ёседи. Алай болмазча, банкдан ипотеканы алайлай эмда быллай субсидия бла багъаларын сорургъа керекди. Ызы бла, тенглешдирип, кесигизге къайсысы хайырлы болгъанын кёрлюксюз.

Ахыры

Кесигиз кёргенигизча, ипотеканы азайтыргъа амал барды, аны ючюн банкны талай излемлерин толтурургъа тюшерикди. Кредит неллай бирге учуз боллугъу кёп затладан къалады: региондан, банкдан, юйню тюрлюсюнден, ахчаны аллыкъ инсандан.