Терк районда жолла тийишли халгъа келтириледиле

КъМР-ни Башчысы Казбек Коков иш бла Терк районда болгъанды. Республиканы оноучусу жолоучулугъун Терек шахарны объездине къараудан башлагъанды, ол «Къоркъуусуз эм качестволу жолла» миллет проектге тийишлиликде жангыртыла турады.

Экикилометрлик тийре Май эм Терк районланы байлайды, аны бла ауур жюкле ташыгъан машиналаны уллу къаууму жюрюйдю. Трасса Россейни Автомобиль жолларыны баш магъаналы ызларына къошулупду. Къурулушчула мында эки тёгерек айланып чыкъгъан развязка эмда путепровод этгендиле, жолда барыу алай бла низамлыракъ боллукъду.

Ишле ахырларына жете турадыла. Улоула жюрюген кесекде эмда къошулгъан жерледе асфаль-бетон къат салыннганды, кёпюр ётюуге ремонт этилгенди, жангы жол белгиле орнатылгъандыла, термопластикден жол ызла салынадыла. Жолну жанлары тапландырыллыкъдыла, чеклеулени да жангыртырыкъдыла.

Битеу да бирге 2019 жылдан бери Терк районда жолланы тийишли халгъа келтириуге республиканы жол фондундан миллиард сомдан аслам бёлюннгенди – регион эмда жер-жерли магъаналы жолланы 50 километри чакълы бирине ремонт этилгенди. Ол ишлеге муниципалитет кеси да къошулады, анга деп бёлюннген субсидияланы хайырланып.