Аскерчилерибизни жетишимлери бандеровчуланы адыргыгъа къалдырады

Тюнене Россейни Къоруулау министерствосу стратегиялы сауутлагъа саналмагъан атом юйрениулени башлагъанды. Аскерчиле атом сауутну   шёндюгю излемлеге келишген мардалагъа кёре хайырланыргъа юйренип тебирегендиле. Юйрениуле РФ-ни Президенти Владимир Путинни оноуу бла бардырыладыла. Аланы биринчи кезиулери 21 майда башланнгандыла.  Ол заманда Францияны Президенти Эмманюэль Макрон эм башха европалы политикле Украинагъа аскерчилерин жиберирге хазырлыкъларын айтхандан сора, аланы жууапларын берирге деп, ол мурат бла башланнган эдиле юйрениуле.

Юг эм Ара аскер округну келечилери атом топланы «Искандер» комплекс бла атаргъа эм авиацияда хайырланнган «Кинжал» ракеталаны да сынарыкъдыла. Къоруулау министерствода билдиргенлерине кёре, юйрениулени бу кезиулеринде  Сауутланнган кючлерибизде къуллукъ этгенле, керек болса, атом сауут бла алагъа салгъан борчлагъа кёре, тийишлисича хайырланырыкъдыла. Мен оюм этгеннге кёре уа, юйрениулени бу кезиулери, Россейге тохтаусуз къажау сюелип тургъан бир къауум тыш къыраллы политиклени къызгъан башларын бир кесек сууутургъа да уллу себеплик этерикдиле.

Дагъыда бир затны чертирге боллукъду, Россейли аскерчиле  Энчи аскер операцияны  жетишимли бардырып тебирегенли, бандеровчула сёлешиулени жангыдан башларгъа кереклисин да билдире,  асыры адыргыдан, не этерге билмей, кеслерин барып тохтагъан башкеслеча жюрютюп башлагъандыла. Аны бла байламлы кёп болмай   РФ-ни Президентини пресс-секретары Дмитрий Песков украинлы миллетчиледен къуралгъан «Азов» отрядны (Россей Федерацияда эркин этилмеген террорист организациягъа саналады) келечилери россейли аскерчини илишаннга салып ёлтюргенлерини юсюнден видеону кёргенден сора: «Ала барып тохтагъан фашистледиле, алагъа да тюз алай къараргъа, жокъ этерге, къурутургъа керекди», - дегенди ТАСС-ны корреспондентини соруууна жууап бере. 

Дагъыда Песков былай чертгенди: «Энчи аскер операциягъа къатышханла неофашистлеге тийишли жууапларын да бередиле. Аллай къужур ишле бла байламлы шартла сюдге тюшер ючюн къауум жылдан бери къагъытла да жыйыладыла. Бизни следовательлерибиз бек къаты бардырадыла ишлерин, бандеровчула аскерчилерибизге жетдирген артыкълыкъла ючюн жууапха тартылмай къаллыкъ тюйюлдюле».

РФ-ни Къоркъуусузлукъ советини таматасыны орунбасары Дмитрий Медведев аскерчилерибизни илишаннга салгъанлагъа жан аурутмазгъа, жууап тюз кеслери этгенча болургъа керекди, дегенди.

Бандеровчула Украинаны халкъына жетдирген къыйынлыкъны алыкъа жамауат толусунлай билмейди. Бу кюнледе, Россейни аскери Донецк Халкъ Республиканы Торецк шахарын азатлагъанда, энчи юйлени подвалларында ол жерли мамыр инсанланы ёлюклери табылгъанлары белгили болгъанды. ТАСС-ны корреспонденти жазгъанына кёре, неонацистле кетип бара туруп, ызларындан къалгъанлагъа от ачып, юйлени да кюйдюргендиле.  

Башха информагентстволаны билдириулерине кёре, ёлюклени асламысы жыл санлары келген адамладыла, сабийле да бардыла. Къачхынчыланы айтханларына кёре, къоншулары адамланы асыраргъа кюрешгенде, бандеровчула дронларын жиберип, хар затны да кёрюп тургъандыла. Бир кесекден алайгъа келип, аланы ёлтюрюп кетгендиле.

Белгилисича, Экинчи дуния урушну кезиуюнде да бандеровчула жаныуарлада окъуна болмагъан кюйсюзлюклери бла атларын айтдыргъандыла. Шёндю уа ала, немисли фашистлени да озуп, тутмакъгъа тюшгенлеге окъуна от ачадыла, ууакъ кесеклеге чачылыучу бомбала бла тегиз жагъада солуй тургъан россейли сабийлени къырырдан да артха турмайдыла. Аны бла бирге,  неонацист ниетлерин саулай къыралгъа сингдирирге эм оноу этерге кюрешедиле. 

Белгили росейли политолог Сергей Кургинян, биринчи каналда «Уллу оюн» бериуде сёлеше, бандеровчуланы жаныуарладан эсе осал болгъан къылыкълары къайдан чыкъгъанларын былай ангылатады: «Украинаны кюн- батыш жанында жашагъанла адамны тутхан кезиуде, жер башында бир жерде жюрютюлмеген амал бла къыйнаргъа, аны бла бирге жанларын алыргъа да ёчдюле. Аланы этген затларын кёргенле, акъылларындан окъуна шашаргъа боллукъдула, ма олду аланы ичлеринде къайнагъан кир ниетлери, бир тёлюден башхагъа ётюп баргъан».

Муну аллында интернетде болгъан видеогъа кёре, бир украинлы неонацист байланып тургъан аскерчибизни ёлтюреди эм андан сора миллетчиле айтыучу сёзлени къайтарып къычырады. Адамланы къолларына чюйле уруп, къабыргъагъа такъгъан, неда саулай тургъанны терисин сыдырып алгъан да бандеровчуланы эрттеден келген къужур къылыкъларыды.

«Бир заманда да бандеровчула христианлада болгъан адамлыкъгъа жууукъ да турмагъандыла, инсаннга жан аурутхан деген затны ала билген да этмейдиле», - деп чертгенди Кургинян.

Бу къужур затланы эшитсенг, Россейни Сауутланнган кючлери энчи аскер операцияны не ючюн бардыргъанларына тюшюнесе. Аскерибиз, къуру оруслула жашагъан жерлени азатлап къоймай, башларын кётюрген фашистлени къурутуу бла да къаты кюрешеди. 

РФ-ни ФСБ-сы туура этген архив документлеге кёре, украинлы миллетчиле Уллу Ата журт урушну кезиуюнде этген огъурсуз ишлерини юслеринден  окъусанг, къанынг башынга урургъа боллукъду. Бандеровчула къолларына тюшгенлени  ёлтюрюрден алгъа къаллай къыйынлыкъла сынатханларыны юслеринден, ол азапдан къутулуп, сау къалгъанланы айтханлары уа адамны чач тюклерин тургъузтады.   Немисли офицерлеге бойсуннган ол жерли адамла къызыл аскерчилени тунчукъдурургъа къалай къадалып кюрешгенлерин да белгилерчады. 

Анга сейир этерча тюйюлдю, нек дегенде Украинагъа оноу этген Зеленский къайда да: «Бандера - ол жигитди!», - деп, къычырып айланады. Аны айтханым, битеу дуния билирге керекди россейли аскерчиле къаллай жау бла кюреш бардыргъанларын. Шартла тохтамагъанлай басмаланып турсала, адамла да ангылап башларыкъдыла шёндюгю украинлы миллетчилени къаллай ниетлери болгъанларын.

РФ-ни Президенти   Владимир Путин былтырны ахырында журналистле бла кезиулю тюбешиуюнде былай айтхан эди: «Энчи аскер операция башланнганлы аны муратлары тюрленмегендиле - Украинада нацистлени къурутуу, аны сауут кючюн азайтыу эм ол къыралны бир аскер биригиуге да къошулмай кеси аллына политика бардырырча этиу». Къырал башчыбызны айтханына кёре, жаланда ол заманда тохташдырыллыкъды анда мамырлыкъ. Ол кюнню уа бизни аскерчилерибиз жууукълашдырып келедиле.