Паспортугъуз бла кредит алгъан эселе

Аманлыкъчыла, адамладан хыйла бла паспортларыны шартларын жыйып, аланы атлары бла кеслерине кредитле алгъан кезиуле аслам чыгъадыла. Сизни паспортугъуз бла ахча алыннганын бла къалгъанын къалай билирге боллугъуну юсюнден «Финансла. Mail.ru» сайтха юрист Мария Яковлева айтханды.

Ол белгилегенича, башха инсанны документлерин хайырланыу бла кредитле алыу кёп жылланы ичинде эм кёп тюбеген аманлыкъ ишледен бири болгъанлай къалады. Жарсыугъа, инсанлагъа берилген кредитлени неда займланы эсеплеген бир система жокъду. Болсада  сизни атыгъыз бла ахча алынганын кредит болумугъузну сурап билирге онг барды. Анда сиз кесигиз неда сизни атыгъыз бла къачан эм къаллай бир ахча алыннганы кёргюзтюллюкдю. Бу жумушну быллай операцияланы бардырыргъа экринликлери болгъан алты бюрону юсю бла тамамларгъа жарарыкъды, аланы тизмелери Ара банкны сайтында берилипдиле.  

Кредит болумугъузда (историягъызда) кесигиз алмагъан ахча борчланы кёрсегиз, аланы берген кредит организациялагъа барып, келишимлени кёргюзтюрлерин излегиз, деп юйретеди юрист. Хыйлачылыкъ этилгени тохташдырылса, полицияда аны юсюнден заявление жазыгъыз. Анда тинтиуле бардырыллыкъдыла, аманлыкъчыла жууапха тартыллыкъдыла.

Аны бла бирге юрист адамланы энчи шартларын къоруулаугъа эс бурургъа чакъырады. Ол мурат бла паспортугъузну копиясын танымагъан адамлагъа бермегиз, банк сервиследе бла энчи аккаунтларыгъызда парольланы уа дайым алышындыргъанлай туругъуз. Керек болса, кредитование болумла эм хайырланыучуланы эркинликлерин къоруулау бла кюрешген юристден болушлукъ излерге жарарыкъды. Ол битеу керекли документлени жыйышдырыргъа болушурукъду эм сюдде сизни эркинликлеригизни къорууларыкъды.

Яковлева билдиргенича, келир  жылны 1 мартындан инсанла къырал жумушланы порталы бла кредит болумланы бюроларына алагъа кредитле неда займла берилмезча заявленияла жазаргъа эркин боллукъдула, бу жумуш ючюн хакъ алынырыкъ тюйюлдю. МФЦ-лада уа аллай заявленияланы 2025 жылны 1 сентябринден алып башларыкъдыла. Анга кёре, кредит организацияла ахчаны борчха бергенде, инсандан быллай заявление келгенин бла къалгъанны тинтирикдиле, аллай тилек азындан 30 кюн алгъа этилген эсе, ахчаны берлик тюйюлдюле эм экинчи ишчи кюн оноуларыны эм аны сылтаууну юсюнден билдирликдиле.