Шёндюгю излемлеге келишген маданият ара

Россейни «Эл жерлени комплексли айнытыу» деген къырал программасына кёре  Элбрус элде  Маданият юй ишленеди.

Маданиятны алгъыннгы юйю Уллу Ата журт урушха дери салыннган эди,  аны жангыртыу  80 – чи жыллада баргъанлыкъгъа, ол шёндюгю излемлеге келишмей эди.  Белгилисича,  къыралыбызда бусагъатда юйретиу ишге аслам эс бурулады, жаланда школлагъа  бу магъаналы жумушну  борчлап къояргъа жарамайды.

Элбрусда маданиятха сейирлери болгъанла кёпдюле, эски мекямда художестволу чыгъармачылыкъны концертлерине эллиле сюйюп жыйылып тургъандыла. Алай анда жаланда жюз бла жыйырма жер бар эди, жангы юйде уа юч жюз боллукъду.

Къурулушчула къабыргъаланы сюегендиле, ызы бла терезеле салгъандыла, юйню башын жапхандыла. Ток бардыргъандыла,  хауа жюрюрча  амалла къуралгъандыла, бусагъатда мекямны ичинде ишле къыстаудула.

Маданият  юйню бу жылны ахырына дери толусунлай хазыр этерикдиле.