Эриучю кофе

Кофени бу тюрлюсю 1938 жылда 24 июльда къуралгъаннга саналады. Аны аслам халда ма ол кюн чыгъарып башлагъандыла. Алай кертисин айтханда уа, быллай кофени тарыхы андан эрттеден келеди.

Бюртюкледен битеу хайырлы затларын чыгъарып, андан эритилген кофе жарашдырыу амалны Чикагода жашагъан японлу химик Сатори Като 1901 жылда тапханды. Беш жыл озгъандан сора уа, Гватемалада тургъан, кеси да кофени бек сюйген ингилиз химик Дж. К. Вашингтон, темир орунда аны биширгенде, къабыргъаларында мор букъу къалыучусуна эс бурады. Ызы бла кюреше кетип, биринчи эриучю кофе жарашдырады.

Ол 1909 жылда тюкенледе Red E Coffee ат бла сатылып башлайды. Аны чыгъаргъан фирма Биринчи дуния урушда АБШ-ны аскерин кофе бла жалчытып болгъанды. Аны женгил хазырларгъа жарагъанын солдатла бек жаратхандыла, алай татыуу уа доюн болмагъанын чертип, хайырланыргъа хазна сюймегендиле.

Nestle компания Бразилияда кофе ёсдюрюучюле бла отузунчу жыллада ишлеп башлагъандан сора быллай кофе кенг жайылады. Ол кезиуде кофе бюртюклени артыгъын не зат этерге билмей эдиле. Тапсыз къургъакъсытып тутаргъа кюрешгенде, ол бузулуп башлай эди. Компанияны специалисти Макс Моргенталер 1938 жылда кофени биз бюгюн билгенча аллай эриген тюрлюсюн жарашдырады. Аны татыуу, хар неси да сакълана эди. Ол жыл окъуна конвейерден Nescafe кофе чыгъып башлайды. Биринчиден АБШ-да, ызы бла уа сау дуниягъа белгили болады ол.

Быллай кофени хайырыны бла хатасыны юсюнден даулашла тохтаусуз барадыла. Алай компанияла аны чыгъарыуну тохтатмайдыла, кёбейте окъуна барадыла, адамла да сюйюп аладыла. Аны ючюн конкуренция ёседи, кофени качествосу да игиден-иги болады.