Кёкшуу бишгенди

Къабарты-Малкъарда кёкшууну ёсдюрюп талай жыл мындан алгъа башлагъандыла. Бирле аны кеслерини бахчаларында саладыла, башхала уа юлкюлени аслам халда орнатадыла. Аллай жерлени ёлчеми 170 гектардан озгъанды, дейдиле республиканы Эл мюлк министерствосунда.

Специалистле айтханларына кёре, Къабарты-Малкъарны жери, хауасы да кёкшуугъа иги келишедиле. Алай аны ёсдюрюу алай женгил тюйюлдю, кёп къыйын салырын, къоранчла да излейди. Эм биринчиден топуракъ ачы болургъа тийишлиди - ансыз юлкюле тирлик берлик тюйюлдюле. Ол умутда назы терекни къышхырын, багуш да хайырланадыла. Дагъыда сугъарыу: юлкюлени тюплери дайым мылы болуп турургъа керекдиле. Жаз башында эмда кюзде семиртгичледен салыргъа унутургъа да жарамайды.    

Элчиле кёкшууну талай сортун ёсдюредиле. Аны себепли шёндюледе башланнган тирлик жыйыу кюзге дери созуллукъду. Аны мында жеринде сатадыла, тыш регионлагъа да жибередиле.

Кёкшуу бла бирге наныкъланы заманы да жетгенди. Башхача айтханда, шёндю тирлик жыйыу къыстау баргъан кезиудю. Министерстводан билдиргенлерича, былтыр мюлклени барында да аладан 6,5 минг тонна жыйгъандыла. Аны бла Шимал Кавказда Къабарты-Малкъар экинчи жерни алады.