Минги таугъа ёрлеулени санарыкъдыла

Къабарты-Малкъарны Курортла эм туризм министерствосундан билдиргенлерине кёре, Минги тауда ёрлеулени эсеплеген дунияда биринчи счётчикни орнатырыкъдыла.

2022 жылда Санкт-Петербургдан тауланы сюйгенлени къаууму Элбрусда болгъандыла. Башында ала бизге дери Европаны эм бийик таууну тёппесине къаллай бир адам жетгенди, келир заманда бери къаллай бир адам чыгъаргъа боллукъду деген сагъышха кирип, аланы санын эсеплерча прибор салыргъа умутланнгандыла. Аны ючюн а механика счётчикни хайырланыргъа боллукъду деген оюмгъа келгендиле: анга жангыз бир кере басаргъа керекди,  къошакъ оборудование изленмейди.  

Эки жылны ичинде къауумну келечилери Минги тауда хауаны энчиликлерин эсге алып тинтиуле бардыргъандыла, битеу шартланы сюзгендиле, микроскоп бла ишлегендиле. Алай бла тот этмеген темирден, бек азындан 50 жылны ишлеяллыкъ приборну жарашдыргъандыла, ол миллион адамгъа дери ёлчемни санаяллыкъды.

Счётчикде кюн система суратланады – илмугъа белгили сегиз планета бла астрофизикле бусагъатда излеген тогъузунчуну кёрюмдюсю да. Аны бирси жанында уа белгили альпинист Анатолий Букреевни: «Тауну бойсундурургъа жарамайды, жангыз да бир кесек заманнга аны бла тенг сюелирге боллукъду», - деген сёзлери уа жазылгъандыла.

 Прибор жууукъ заманда Элбрусну кюнбатыш жанында орнатыллыкъды, аны юсюнден «Приэльбрусье» миллет келишим тауусулгъанды. Бу жумушну Санкт-Петербургну къаууму кеси толтурлукъду, аланы биргелерине къутхарыучула, гидле да барлыкъдыла.