Тирликни бузмай тутарча

Бизни республикада «Эльбрус Фрутт» предприятие  тирлик  бузулмай,  тутарча жер (объект) ишлейди. Бу объектни къурулушуна РФ-ни Эл мюлк министерствосуну льгота программасыны чеклеринде, ВТБ банк сегиз жыл болжалгъа 330 миллион сом кредит бергенди.

КъМР-ни Эл мюлк министерствосундан билдиргенлерине кёре, объект Басхан шахарда орналлыкъды. Ол кеси да келир жыл жаз башында ишлеп башларыкъды. Проектине кёре,  аны ичинде 24 уллу отоу боллукъду. Хар биринде да хауаны къурамына, сууукълугъуна да энчи оборудование контроль этерикди. Айтханларына кёре,  аланы барына да 6,5 минг тонна алма сыйынып, бузулмай иги кесек заманны сакъланырыкъды.

«Эльбрус Фрутт» Къабарты-Малкъарда алма ёсдюрюу бла кюрешген эм уллу предприятияладан бирине саналады. Былтыр аны бахчаларындан 3,9 минг тонна тирлик алгъандыла. Быйыл а аны 4,7 минг тоннагъа жетдирирге дейдиле. Кесини быллай объекти болмагъаны ючюн, продукциясыны багъасы уллуракъ бола эди.

«Биз алмаланы эм къыйматлы (терк айныгъан) технология бла ёсдюребиз. Хар терекни тюбюне суу келеди, ала хар бири да ары-бери аумазча темир жипге къысылыпдыла, башларын а аула жабадыла - буз уруп хата салмаз ючюн. Иш алай къуралгъаны себепли тирлик, аны качествосу да иги боладыла. Керти да, сагъынылгъан объект бизге бек керек затды. Аны хайырындан кесибизде тирликни сакъларгъа, башхалагъа да отоуларын ортакъгъа берип,  хайырын кёрюрге боллукъбуз. Анга уа излем барды – аны да билебиз», - дегенди бу предприятияны башчысы Алим Акушев.

«Бюгюнлюкде Шимал Кавказны агропредприятиялары къуру продукция чыгъарыугъа угъай, аны бузмай тутаргъа, андан ары жарашдырыргъа да ахча къоратадыла эм кёп къыйын саладыла. Ишни ол халда къурап баргъанлары себепли башха къоранчлары азаядыла, дагъыда жангы ишчи жерле къураргъа эмда производствону кенгертирге онг чыгъады. Бизни банк а, кеси жанындан, элчилеге инвестиция проектлерин тамамларгъа, кезиулю ишлерин да бардырыргъа не жаны бла да себеплик этерге хазырды», - деп белгилегенди ВТБ-ны Шимал- Кавказ федерал округда бёлюмюню башчысы Александр Дыренко.