Байрамла къууанчлы ётер ючюн

«Единая Россия» билим бериу учрежденияланы тынгылы жангыртыу эм ишлетиу жаны бла президент программаны ал эсеплерин чыгъаргъанды. Владимир Путинни буйругъу бла   программаны партия Жарыкъландырыу министерство бла бирге толтурады.

Билим бериу учрежденияланы тынгылы жангыртыуну эм ишлетиуню  программасы жашауда къалай бардырылгъанын «Единая Россияны» эм Жарыкъландырыу министерствону федерал штабыны жыйылыуунда сюзюлгенди. Аны Генсоветни секретарыны къуллугъун толтургъан   Владимир Якушев эм министр Сергей Кравцов бардыргъандыла.

Владимир Якушев билдиргенича, бу кезиуде 1236 школ бла 1680 сабий сад ишлетилгендиле. Быйыл 364 школну битдирип, хайырланыргъа берирге мурат барды, алада 300 минг окъуучугъа жер къуралгъанды.

Тынгылы жангыртыуну программасыны чеклеринде 4122 школну болуму игилендирилгенди. Быйыл федерал бюджетден бёлюннген ахчагъа 1057 школну тапландырыргъа  борчла салыннгандыла, битеу ишле болжалда бардырыладыла. 534 школда тийишли жумушла 2025 жылда бошаллыкъдыла.

 - 1030 объект бла байламлы келишимле этилгендиле. Бу жаны бла бютюнда  Ставрополь  край,  Татарстан, Белгород, Калуга, Нижегород, Тульск, Новосибирск, Омск, Свердловск областьла,   Кузбасс жетишимлидиле. Барыгъызгъа да иги ишлегенигиз ючюн ыспас этеме,-дегенди  Якушев.

Ол программа жангы регионлада да тири бардырылгъанын чертгенди.  «Битеу чырмаулагъа къарамай, жангы регионла программагъа къошулгъандыла, кёрюмдюле игидиле»,- дегенди   Владимир Якушев.

Кемчиликлени юслеринден айтханда, 25 школда келишимле этилмегендиле, тёрт регионда борчла жыйылгъандыла, ол санда   Курган областьда,   Иркутск эм  Томск  областьлада бла  Къарачай-Черкесде.

Жангы объектлени ишлетгенде 56 регионда болжалла сакъланмазлыкъларына къоркъуула бардыла. Владимир Якушев аланы башчыларындан къурулушланы контрольгъа алыргъа, иш къалай баргъаны тинтип турургъа тилегенди.

 -    22 июльдан   18 августха дери  тынгылы жангыртыу жумушла, школланы керекле бла жалчытыу къалай баргъанын тинтирикбиз. «Жангы школ» партия проектни толтуруугъа жууаплыланы, депутатланы бу соруугъа энчи эс бурургъа чакъырама. Сентябрьде  байрамла къууанчлы халда ётерге керекдиле,-деп къошханды ол.

Тынгылы жангыртылгъан школлада болумну тинтиуге депутатла жууаплыдыла.    Сергей Кравцов, сёзге къошула, бу система кесини хайырлылыгъын кёргюзтгенин белгилегенди.

 - «Жаш тёлю бла сабийле», «Юйюр» миллет проектле хазырдыла. Аланы тамамлагъанда тынгылы жангыртыу программаны толтургъанда жыйылгъан сынамны хайырланыргъа боллукъду,-дегенди министр.

 Федерал штабда дагъыда «Сабийни школгъа хазырла» тёрели партия проект башланнганы белгиленнгенди. Аны чеклеринде «Единая Россия» кёп сабийли юйюрлеге, къолайсызлагъа, къыйын жашау болумгъа тюшгенлеге школгъа керекли затланы жыйышдырыргъа болушады. Былтыр битеу къыралда быллай себеплик 220 минг сабийге берилгенди. Аладан 60 мингден кёбюсю   Донбассдан бла  Новороссиядан школчуладыла.   Владимир Якушев   быйыл да жангы регионлагъа энчи эс бурургъа чакъыргъанды.

 Школчулагъа кереклени партияны башчысыны жамауат приёмныйлеринде эм жамауат болушлукъну штабларында къурайдыла.

 Къабарты-Малкъарда школ системаны жангыртыугъа бурулгъан халкъ программаны чеклеринде 2024-2025 жыллада 13  объект тапландырыллыкъды. Аладан 7-си эки жылны ичинде толтуруллукъду,  къалгъанлары уа – бир жылны.

-   13 объектни конкурс  документлери хазырдыла, 7-синде тийишли жумушла башланнгандыла,-дегенди     KABARDIN-BALKAR.ER.RU сайтны журналистлерине Парламентни Билим бериу, илму эм жаш тёлюню ишлери жаны бла комитетини башчысы, «Жангы школ» партия проектни регионда толтуруугъа жууаплы Нина Емузова.   

-  КъМР-де  2022-2024 жыллада 19 школну ишлетирге планла салыннгандыла, алада 11,4 мингден аслам окъуучугъа жер къураллыкъды.  Ол битеу окъуучуланы 10 процентиди. Алай бла окъутууну къурау, кадрла бла жалчытыу жаны бла уллу борчла салынадыла. Былтыр 6 школ ишлетилгенди, алада 1 сентябрьде окъутуу башланырыкъды. Энтта 10 билим бериу организациягъа мекямла ишлетилликдиле,-дегенди ол.

Тынгылы жангыртыу жумушла регионда  андан ары бардырыладыла. 2022 жылдан бери 60 мекям тап халгъа келтирилгенди, 2024 жылда 13 школда башланыллыкъдыла жангыртыу ишле. 2026 жылгъа дери 57 школну тап халгъа келтирирге белгиленеди.