Оюн халда жорукълагъа тюшюндюрюу

Жай – солуу  кезиу  болгъандан сора да, къоркъуу аслам чыкъгъан заманды. Нек дегенде жылы айлада сабийлени араларында ачыгъанла кёп боладыла. Аланы къоркъуусузлукъларын, тынчлыкълы солууларын жалчытыу бла уа тийишли  болгъан министерствола бла службала кюрешедиле.

Жарыкъландырыу ишни тамамлау бла байламлы бу кюнледе сабий чыгъармачылыкъны «Кюн  шахар» академиясында «Къоркъуусуз солуу кезиу» деген акция бардырылгъанды. «Къоркъуусузлукъну лабораториясыны», Къырал автоинспекцияны бла МЧС-ни регион бёлюмюню келечилери гитчелеге юйретиуле къурагъандыла, алагъа къоркъуулу жашау бардырыуну юсюнден дерс ётдюргендиле.

МЧС-ни келечиси Мурат Халишхов от къаллай сылтаула бла тюшгенини, от бла ойнау къаллай къыйын болумлагъа келтирирге боллугъуну, зат жаннганда уа, болушлукъ этиу службала къалай чакъырылгъанларыны юсюнден айтханды, бу жорукъла сабийлени эслеринде къалырча уа китапчыкъла да юлешгенди. «Къоркъуусузлукъну лабораториясыны» полициячылары бла ишчилери ойнаргъа арбазда жангыз да автомобильле бла мотоциклле жюрюмеген, сабийлеге деп энчи бегитилген жерледе жарагъанын эсгертгендиле. Жолланы макетлеринде уа сабийле белгилени салгъандыла, жаяу жюрюгенле, машинала да къалайтын барыргъа керек болгъанларын кёргюзтгендиле, сора жорукъланы билирге эм аланы бузмазгъа сёз бергендиле.  

Регионну от тюшюуге къажау службасыны къошакъ билим бериу эм усталыкъ хазырланыу бёлюмюню устазы Мадина Аброкова ачыгъаннга биринчи медицина болушлукъ къалай этилгенин кёргюзтгенди. Гитчеле къанны тохтатыргъа, сюек сыннганда неда эзилген кезиуледе байлау салыргъа юйреннгендиле. Бу жумушла сабийлеге сейир кёрюннгендиле, ахырында ала кеслерин манекеннге биринчи медицина болушлукъ этип да сынагъандыла. Алай бла оюн халда гитчеле артда жашауларында жарарча билим алгъандыла, деп билдиредиле МЧС-ни регионда Баш управлениясыны пресс-службасындан.