Жорукъланы бузмау – хатадан сакълар

Юсюбюздеги жылны аллындан бери Къабарты-Малкъарда 906 от тюшюу болгъанды, деп билдиредиле бизге РФ-ни МЧС-ни КъМР-да Баш управлениясыны пресс-службасындан. Жашау журтлада - 84-сю, къургъакъ кырдыкны жандырыу бла байламлы уа - 506. Битеу да ол отлада бешеуленни къутхаргъандыла, ол тийреледен а 168 адамны кёчюрюрге тюшгенди. Жарсыугъа, саулукъларына бла санларына чып тюшгенле да болгъандыла. Аланы саны 27-ге жетгенди. Алтаулан а ёлгендиле. 900 миллион сом багъасы мюлкню къутхарыр амал болгъанды.

Белгилисича, от тюшюулени асламы адам улуну уллу кёллюлюгюню хатасындан боладыла. Тохташдырылгъан жорукълагъа бузукълукъ этиу бла эс бёлмеу аллай болумгъа келтиреди. Аны себепли ол затланы къуруда эсде тутаргъа керекди. Тюрлю-тюрлю оборудованияны хайырланнган кезиуде сакълыкъ бек магъаналыды.  

Къургъакъ хансны жандырыу ючюн 40 адам административ жууаплыкъгъа тартылгъандыла эм алагъа тазир салыннганды. Ол кёрюмдю 5 - 400 минг сом чакълыды.

От жашау журтланы да терк алыргъа болады. Аны себепли хар бирибиз да ол затха эс бёлюрге борчлубуз.

От тюшюуден сакъланыр ючюн, бузукълугъу болгъан ток ызла, приборла бла хайырланыргъа эркин этилмейди. Газ печьлени бла башха техниканы ёчюлтюрге унутмагъыз. Сабийлеге да къоркъуусузлукъну жорукъларын ангылатыгъыз. Битеу бу затланы тап толтуруу хатадан сакъларыгъы хакъды.