Сынамларын ёсдюредиле

Жыл башланнганлы «Россети Северный Кавказ» «Каббалкэнерго» биригиуде ишлеген 920 чакълы специалист сынамларын ёсдюрюрча, квалификацияларын кётюрюрча курсланы ётгендиле.

Ол санда бийик жерледе ишлерге, эсеплеген приборлагъа къараргъа, от тюшмезча мониторинг бардырыргъа, биринчи медицина болушлукъ берирге, саулукъгъа заран жетмезча кийимлени, оборудованияны хайырланыргъа эм башха затлагъа юйреннгендиле.

Курсла Ессентукда «Россети Северный Кавказ» биригиуню Энергетика жаны бла корпоратив институтунда ётгендиле. Аны бла бирге бир къауум специалист Петербургну энергетика, квалификацияны ёсдюрюу жаны бла «Интеграл» институтлада, Сибирьни энергетикадан окъутхан арасында да ётгендиле.   

- Ишчилерибиз квалификацияларын ёсдюрюрча дайым биз уллу эс бурабаз. Аланы билимлерине эм сынамларына кёре республика ток бла тынгылы жалчытылынырыкъды. Саулай алып айтханда, жылны ахырына курсланы 1,7 минг адам ётерге борчлуду. Анга деп 7 миллион сом бёлюнюрюкдю, - дейди «Каббалкэнерго» биригиуню таматасы Резуан Загаштоков.