Жамауатны излемлери эм сейирлери къорууланнган жерлеге бурулгъандыла

«Единая Россияны» жамауат приёмныйлери ишлеп башлагъанлы 16 жыл толгъанды.  Партияны генсоветини секретарыны орунбасары Анна Кузнецова оюм этгенича, бу заманны ичинде ала юйюрлени, сабийлени, пенсиячыланы, энчи аскер операциягъа къатышханланы излемлери эм сейирлери къорууланнган жерлеге бурулгъандыла.

2020 жыл бла тенглешдиргенде, быйыл партияны жамауат приёмныйлерине тарыгъыулары, тилеклери, башламчылыкълары бла келгенлени саны 50  процентге ёсгенди. «Аланы арасында социал соруула биринчи жерни аладыла – 38,5 процент. Ызы бла жашау журт-коммунал мюлкню иши бла байламлы тилекле келедиле – 14,6 процент. Дагъыда арбазланы тапландырыу, кёп къатлы юйлеге башчылыкъ этген компанияла, тарифле бла байламлы тарыгъыула бардыла. Аскерде къуллукъ этиуню юсюнден соргъанланы саны 4,1 процентге жетеди»,-дегенди Анна Кузнецова.

 Ол айтханыча, энчи аскер операциягъа къатышханла эм аланы юйюрлери асламында  медицина болушлукъну, тёлеулени, ырысхы-техника бла жалчытыуну юслеринден айтадыла. «Хар тилекни да сюзюп, болушургъа кюрешебиз. Бир-бир соруула федерал даражада  тамамланадыла, ала бла байламлы профильли министерствола бла кенгешле къураладыла, экспертлени  оюмларына тынгылайбыз»,-деп къошханды ол.

 Анна Кузнецова партияны  халкъ программасыны мурдорун инсанладан келген тилекле бла тарыгъыула къурагъанларын чертгенди. Аны бла бирге ишде жангы амалланы сингдириуге себеплик этедиле. «Приёмныйледе жамауат тутхучлукъну штаблары, инсанлыкъ  башламчылыкъланы «Единые» аралары ишлейдиле, коммерциялы болмагъан организацияла бла байламлыкъла къуралгъандыла, ала бла бирге социал магъаналы соруула сюзюледиле, проектлени жашауда бардырыугъа болушлукъ бериледи, юйретиу семинарла къураладыла»,-дегенди сёзюню ахырында Анна Кузнецова.

Къабарты-Малкъарда уа партияны районлада 12 жамауат приёмныйлери ишлейдиле – алагъа   кюндюз 10 сагъатдан  ингирде 17 сагъатха дери келирге боллукъду. Алада инсанланы тилеклерине регионну башчысы, РФ-ни сенаторлары, Къырал Думаны депутатлары, башха жууаплы къуллукъчула тынгылайдыла.

Тилеклени уа приёмныйге келип, неда  почта бла, ол санда электрон, ашырыргъа жарайды. Аны бла бирге приёмныйледе «къызыу ызны» телефонлары да бардыла, алагъа сёлешип жарсыуланы айтыргъа, аланы тамамлауну жолларына билирге онг барды, деп билдиргендиле  KABARDIN-BALKAR.ER.RU сайтда. Ол санда инсанладан жашау журт-коммунал мюлкню ишини, медицинаны, социал тёлеулени, къыйын жашау болумгъа тюшгенлеге болушлукъну, ол санда волонтёрладан, юслеринден соруула келиучюдюле. 

  Жылны аллында уа партияны регион жамауат приёмныйинде Жамауат тутхучлукъну штабы ачылгъанды. «Ол кёп функциялы майдан болгъанды. Анда  жамауат приёмныйден сора да жаш тёлюге энчи жер, жыйылыула бардырылгъан зал  бардыла. Мында   семинарла, жандауурлукъ жумушла чыгъармачылыкъ курсла къураладыла»,-дегенди штабны башчысы, Нальчикни жер-жерли администрациясыны таматасы   Таймураз Ахохов.

Ол айтханыча, штаб властьны бла жамауатны арасында байламлыкъла къуралгъан жерге бурулгъанды. Анда хакъсыз жамауат магъаналы жыйылыула, конференцияла къураргъа онг барды. Бюгюнлюкде уа анда асламында энчи аскер операциягъа къатышханлагъа болушлукъну соруулары бла байламлы ишле къураладыла.