Жорукъланы эсде тутарча

РусГидро компанияны Къабарты-Малкъарда бёлюмюню башламчылыгъы бла Нальчикде 10-чу номерли китапханада магъаналы дерс ётгенди. Ары келген сабийлеге электрокючню къоркъуусузлу хайырланыуну юсюнден хапарлагъандыла. Дерсни уа «2022 жылны Устазы» битеуроссей конкурсда хорлагъан Аслан Кашежев бардыргъанды.

Гитче къонакълагъа ол электрокючню тюрлюлерини, юйде приборланы къоркъуусузлу хайырланыуну, ток ызланы къатларында ала кеслерин къалай жюрютюрге керек болгъанларыны юсюнден айтханды. Анга иги тынгылагъанлагъа, сейирлерин жашырын этмей, соруула да берип тургъанлагъа компания басмалагъан китапланы саугъагъа бергендиле.

«Бу дерс бизде бардырылгъанына бек ыразыбыз. Сабийле кёп магъаналы зат билгендиле, эшитгендиле, сынам жумушлагъа да къатышхандыла. Мен оюм этгеннге кёре, быллай билим бютюнда шёндю, жай каникуллада хайырлыды. Нек дегенде бу кезиуде сабийле юйде кеслери къала туруучудула», - дегенди китапхананы башчысы Амина Бажева.

Энергетикле ата-аналагъа сабийлери бла ушакъ этерге, алагъа электрокючню магъанасын ангылатыргъа, ол не бла къоркъуулу болгъанын билдирирге чакъырадыла. Дагъыда аланы ток ызланы эмда трансформаторланы   къатларында ойнаргъа, чыпынлагъа ёрлерге, подстанцияланы тийрелерине кирирге, юйде, подъездледе электрокюч щитлени ачаргъа къоймагъыз, дейдиле.