Алгъадан жалгъанмагъан артда да тутулмаз

Жангызлыкъ деген сёзню магъанасын хар ким да кесича ангылайды.  Тиширыула бла байламлы ол   бютюнда эс бёлюрча жарсыуду, дерге боллукъду. Жашауу хар кимни да энчи къуралады. Бирле эрге барып да кеслерин жангызлай сезедиле. Башхала уа жангызлай да насыплыдыла. Быллай оюмлагъа мен кёплени энчи жашау болумларыны юслеринден хапарларына бла тарыгъыуларына тынгылагъандан сора келгенме.

 Алимле жангызлыкъ сынагъанланы юч тюрлюге юлешедиле. Биринчи къауумгъа жангыз болгъанлыкъгъа, андан насып сезгенле киредиле. Экинчилери - жангызлыкъда кеслерин насыпсызлагъа санагъанладыла. Ючюнчюлери уа насыпсызла, алай халкъны аллында аны букъдурургъа кюрешип, кеслерин насыплы кёргюзтюрге итиннгенледиле. Бу къауумланы хар бирин да энчи тинтирге боллукъду.

Къалай-алай болсада, жангызлыкъ тиширыуну, эр кишини да ичинден ашайды десек, ётюрюк болмаз. Бютюнда ол жылла бла тюрленмеген болум эсе.  Эр киши кесини жашаууна кеси ие болгъанлыкъгъа, тиширыуну аллай онгу болмайды. Аны юйюнден ата-ана ыразылыкъсыз ары-бери кетип жашауун тюрлендирир амалы жокъду. Отуз жылларына дери жангызлай тургъан къызларыбызны асламысыны болумлары алайды. Усталыкълары эрттенден ингирге дери тышына чыкъмай урунуу бла байламлы болгъан къызларыбыз анга юлгюдюле. Ол себепден аланы кеслерин кёргюзтюр, танышып, жашауларын къурар онглары жокъду.

Шёндюгю жашауда телефон, социал сетьле болсала не жарсыу, дегенле да чыгъарла.  Алай ала бла хайырланыргъа таукел болгъанла да аздыла. Былайда дагъыда бир зат барды. Жыл саны отуздан атлагъан тиширыу тынчлыкъгъа юйренип, кесин башха жумушла бла къыйнаргъа сюймей башлайды. Заман а тохтаусуз барады. Жашларыбыз, кечирек къалсала да, къармашыргъа кюрешедиле, излейдиле. Къызларыбызны излемлери да ол кезиуге иги да ёседиле, кеслерине тийишлилеге тюбеялмай да къаладыла... Хар бирибизни да жууугъубузда бла ахлубузда да бардыла юйюрсюнмеген аллай жашла бла къызла. Кесигиз сагъыш этигиз, бир юйюрде аллай экеулен болса окъуна, миллетибизни санына, бек аздан,3-4 сабий къошулмай къаладыла.

Тиширыуланы юслеринден энчи айтханда, былайда эрде болуп, алай юйюр жашауда да жангызлыкъны сезгенлей тургъан къауумда энчи тохтарчады.  Той аз да болушалмаз, арада сюймеклик болмай  къуралса юйюр. Эрде болгъан кёп тиширыуладан кеслери алларына жашагъанлагъа сукъланнганла да бардыла. Анга юлгюле да аз тюйюлдюле жашауда. Баш ие бла аллындан окъуна ара тап болмаса, артда тюзелмез. Ол а юйюрню  чачыллыгъыны биринчи белгисиди. Жаш бла къыз бир бирлерин игирек таныргъа керекдиле деп, сагъышым алайды. Хау, адамны биргесине жашап тебирегинчи, халини хар жашырынына да тюшюнюр амал жокъду. Болсада  араларында бир бирге тартындыргъан сезим болургъа керекди. Ансыз экисини да жашаулары башха-башха ётерикди. Аллай тюрлю халда сабий окъуна болушмайды.

Аны себепли омакъ эм бай той хар неден да сакъларыкъ сунуу - алдауукъ оюмду. Аны ангыларгъа керекди. Аллай юйюр жашауда тиширыуну психикасына да заран жетмей къалмайды. Кёплеге специалистлеге жюрюп, энчи багъыу алыргъа да тюшеди. Алай сабий тууса, хар не да тап болур, деп ийнанып жашагъанла да аз тюбемейдиле.  Кертисин айтханда, жюрекни къууандыргъан тюрлениуле ол шарт бла келип да къалмайдыла. Аны себепли, тиширыу кеси жашаууна алгъадан да ие бола билирге керекди. Насыбындан ачхычланы биреуге ышанмазгъа. Ол а неди? Бек-биринчиден, этген атламын сюзюп, артда не да тап болур деген сагъышладан кери къалып. Алгъадан жалгъанмагъан артда да тутулмаз. Эр киши, юйюр жашау да тиширыугъа жашауун андан да насыплы этерге деп бериледиле.  Ол затны бир заманда да унутургъа керекмейди. Жангызлай къалыргъа къоркъгъандан, эссизлик этерге да жарамайды…