Журналист, жырчы, математик

2000 жылланы аллында кёпле Атталаны Азнорну  аламат ауазлы, фахмулу жырчыныча таный эдиле. Бир къауум замандан а аны республикалы даражалы къууанчлы байрамланы бардырыучунуча чакъырып тебирейдиле.  Шатык ауазлы жашны республикада ишлеген телеканалла да эслейдиле. Ма алай бла Атта улуна журналистикагъа жол ачылады. Бюгюнлюкде ол «РИА КБР» агентствону баш редакторуду, «КъМР-ни сыйлы журналистиди».

Азнор кеси Къыргъызда туугъанды. Аланы юйюрлери Кант шахардан узакъ болмагъан Дмитриевка деген элде жашагъанды. Аппасы Сагъыт, юйдегиси ауушхандан сора, Кавказгъа къайтыргъа сюйгенин билдирип, жашыны юйюрюн жолгъа хазырланыргъа чакъырады. Жашы Виктор, келини да ол кезиуде эл колхозда ишлей эдиле. Аны себепли ишлерин, юйлерин да къоюп, жолгъа атланалмайдыла.

- Алай бла аппам алгъа кеси кетеди. Сора бир къауум кезиуден къайтып келип, не мени, не гитче къарындашымы биргесине элтирге сюйгенин билдиреди. Тау адетге кёре, аны ол оноууна угъай деп биреу да айтмайды. Мен ол жыл школну бошагъаным себепли уа, аны бла мени жиберирге дейдиле. Ол 1998 жыл эди. Анамдан кёп кере соргъанма сабийинги къалай берип жиберген эдинг деп. Ма алай бла келгенме Нальчикге, - деп эсгереди ушакъ нёгерим.

Ала аппасыны тамата къарындашыны юйюнде Урванда жашагъандыла. Адамла бла танышыу, байламлыкъла тохташдырыу Азноргъа ал кезиуде тынч тюйюл эди. Кавказгъа келишалмай, юч жылны ичинде артха, Къыргъызгъа, кетерге деген акъылын бир такъыйкъагъа да унутмай жашагъанды. Биринчи жыл ол бийик билим берген окъуу юйлеге документлени берген заманны ычхындыргъаны себепли, Автомобиль транспортну лицейине окъургъа киреди.

- Артыкъ тенгим, башха жумушларым да болмагъанлары себепли, аны къызыл дипломгъа бошап, «Халкъла аралы пассажир улоуланы къураучу» деген усталыкъны алама. Эсимдеди, дипломуму къоруулагъан кезиуде Москвадан келип, комиссияда олтургъан бир тиширыу аны жашауда бардырырча сатып окъуна алгъан эди, - дейди Атта улу.

Диплом таматасы Азноргъа окъууун андан ары бардырырча, башха шахарланы биринде бийик билим берген окъуу юйге кирирге кереклисин айтады. Алай туудугъун ансыз да аз кёрген Сагъыт ол затны унамайды. Алгъан усталыгъына къаршыракъ ызладан сайлай, ол КъМКъУ-ну математика факультетине киреди. Анда уа «Студент жаз башы» деген фестивальгъа къатыша тебирейди. Фахмулу жашны Амир Кулов эслейди эм кеси ишлеген искусстволаны школуна вокалдан дерслерине чакъырады. Бир къауум замандан а Искусстволаны Шимал-Кавказ къырал институтуну вокал бёлюмюне кирирге да кёллендиреди.

- Ары киреме. Аны бла бирге университетде да окъуууму бардырып, 2007 жылда дипломуму алама. Алай Институтдан а, 5 жыл да окъуп, ахырына жетдирмей чыкъгъанма. Болсада бир кюн да сокъуранмагъанма анда ётдюрген жылларым зырафына кетгендиле деп. Нек дегенде ауазымы, сёлешиуюмю да анда тынгылы жарашдыргъанма десем, ётюрюк болмаз. Ол вуз манга кёп зат бергенди. Артда «Европа плюс» радиогъа да аладыла. Журналистика бла биринчи танышыуум да андан башланнганды деп айталлыкъма, - дейди ол.

Институтда окъугъан жылларында Атта улу Москвада жыр искусство жаны бла окъуугъа кирирге таукел болады. Ары ол Чайковский атлы консерваториягъа кирирге деп барады. 160 адамдан  комиссияны 25 адам ётедиле. Ол санда  Азнор да. Алай конкурсну ючюнчю туруна тебиреген кезиуюнде, Атта улу терс троллейбусха олтуруп, башха жанына кетеди.

- Мен ары жетген кезиуде, манга бёлюннген заман да, кезиу да ётюп эдиле. Алай муратым ол залда бир кере окъуна жырларгъа эди, комиссияны келечилери аны толтурургъа эркин этген эдиле. Италиян тилде арияны айтхан эдим. Ала эндиги жыл къайтып келирими тилейдиле. Болсада, къадар болмады, - деп эсгереди ушакъ нёгерим.

Атасы, анасы эм гитче къарындашы уа Азнорну бери 2005 жылда, жашлары юйюр къурайма деген кезиуде кёчгендиле. Ала  13 октябрьде болгъан жарсыулу ишлени кезиуюне тюшюп, бир кесек абызырагъан эдиле. Атасы артха кетерге да бир башлайды. Нек дегенде Нальчикдеги болум аланы бек къоркъутхан эди.

Атталаны Азнорну журналистикагъа биринчи тири атламы уа 2010 жылда башланнганды. Аны «Россия 1» телеканалгъа орус тилде жангылыкъланы бардырыргъа чакъырадыла.

- Менича тышындан келип, телевиденияны ишинден бир ангылауу да болмагъан адамгъа, ол ишге келишиу тынч тюйюлдю деп толу айталлыкъма. Манга анда Гуляланы Жанна бек болушхан эди насийхатчылыгъы бла. Жанна Башировна эфирге хазырланыугъа бек къаты эди. Бир-бирде кёлюбюзге окъуна тийиучюсю эсимдеди. Болсада артда ол бек болушхан эди манга. Бек ыразыма аллай тынгылы школну ётгениме аны къолунда, - дейди Азнор Викторович.

Бир кесекден а Азнор эм дагъыда бир къауум журналист экстремист къауумланы келечилеринден жашауларына къоркъурча билдириуле алып тебирейдиле. Алай бла ишден, республикадан да кетип жашаргъа тюшеди. Къайтхандан сора аны «1КБР» республикалы телевидениягъа чакъырадыла. Арт эки жылда уа мени жигитиме «КБР-инфо» республикалы инфорамациялы агентствону ышаннгандыла. Кесини бюгюннгю коллективи бла ол бир тил табып ишлейди. Ала ишге сюйюп келирча онгла да къурайды.

- Мени оюмум, адам ишине къууанып келирге керекди. Ол алай болур ючюн а, биз, таматала, алагъа аллай онгла къураргъа борчлубуз. Сюймегенлей этилген жумушну бир заманда хайыры да чыкъмайды, - деп чертеди ол.

Ишден бош заманын Атта улу тенглери, юйюрю бла ётдюрюрге бек сюеди.