Законсуз байыкъланыргъа умут этгенди

Нальчикде УМВД-ны следствие бёлюмюню къуллукъчулары къурулуш организацияладан бирини 45-жыллыкъ башчысына ачылгъан уголовный ишни тинтип бошагъандыла. Ол кёп къатлы юйню ишлетгенде фатарланы иелеринден ахча жыйыу (долевой) жаны бла законлагъа бузукълукъла этгени тохташдырылгъанды.

 Аманлыкъ  КъМР-де МВД-ны бла УФСБ-ны къуллукъчулары бирге бардыргъан излеу-тинтиу жумушланы кезиуюнде ачыкъланнганды. 2020 жылда октябрьден 2023 жылда декабрьге дери кезиуде къурулуш фирманы башчысы 24 инсандан Нальчикде Шогенов атлы орамла кёп къатлы юйню ишлетирге 24 миллион сом алгъанды, алай  ала бла тийишли келишим этмегенди. Андан сора да, Нальчикни эки инсаны бла къурулушха 1,8 миллион сом инвестиция къошханларыны юсюнден келишим этгенди. Ахчаны ол кеси кереклерине къоратханды.

 Бу шартла бла байламлы РФ-ни УК-сыны 200.3-чю статьясыны 3-чю кесегине эм 159-чу статьясыны 4-чю кесегине кёре терслеу материалла ачылгъандыла. Ала къабыл кёрюлюп, Нальчикни сюдюню къараууна берилгендиле.