Артыгъын тыш къыраллагъа сатадыла

Республиканы эл мюлкю ёсе баргъаны себепли продукцияны кёп тюрлюлери бла кесибизде алыучуланы толусунлай жалчытып, артыгъын тыш къыраллагъа сатаргъа да онг чыгъады. «Агропромышленность продукцияны экспорту» деген къырал программаны чеклеринде 2023 жылгъа Къабарты-Малкъаргъа тышына 13,4 миллион доллар багъасына сатыу этерге борч салыннган эди. Регионну Эл мюлк министерствосундан билдиргенлерине эмда Федерал таможня службаны тергеулерине кёре уа ол 78,3 процентге артыгъы бла толтурулуп, 23,9 миллион долларгъа жетгенди.

Алай бла былтыр жыйырмадан артыкъ къыралгъа экспортха жиберилген продукциядан ючден бирин (34%) мирзеу (асламысы нартюх урлукъду) алгъанды. Энтта да 51 проценти аш-азыкъ эмда жарашдырыучу промышленность предприятияланы продукцияларыды (татлы ашарыкъла, гара эмда татлы суула, кёгет эмда жемиш консервала, макаронла). Крахмалны эмда асламлы къауумлагъа кирмеген продукцияланы тюрлюлерин сатыу онюч процентге жетгенди. Къалгъан аз кесеги уа битим жауладыла. Тергеулеге кёре 2030 жылда быллай продукцияланы экспорту 2021 жылны кёрюмдюсюн 1,5 кереге озуп, 25,9 миллион доллар боллукъду.