Аламат суратла бла къууандыргъандыла

Алгъаракълада КъМР-ни Миллет музейинде Шимал Кавказда биринчи кере «Гардарика-Кавказ» арт-фестиваль къуралгъанды. Аны Санкт-Петербургну искусствоведлери жарашдыргъандыла.

 «Биринчи эки проектибизни Выборг шахарда Эрмитажны филиалында къурагъанбыз. Кёпле жаратхан проектни мындан ары да башха шахарлагъа чыгъарыргъа сюйгенбиз. Кёп жерлеге чакъыргъандыла, алай Нальчикни барысындан да бек жаратханбыз. Аны себепли биринчи сизни республиканы сайлагъанбыз», - дегенди эксперт, бу проектни автору Римма Кириллова.

 Аны чеклеринде Миллет музейге эки жюз сурат келтиргендиле. Аланы Россейни жетмишден аслам белгили суратчылары ишлегендиле. Ол чыгъармаланы санында 1901 жылда жазылгъанла да бардыла. Римма Кириллова проектни атына «Гардарика» деп бошдан айтылмагъанын да чертгенди. Эртте заманлада алай Буруннгу Русьха айтхандыла. Ол кезиуледе Русьну санына кёп шахарла киргендиле. Аланы барысыны да кеслерини энчиликлери, маданият байлыкълары да болгъанды. Быллай кёрмючле биринчи кере императорланы заманында къуралгъанын да билдиргенди кёрмючню куратору Елена Пинежанинова. Алай бюгюнлюкде фахмулу суратчыланы ишлерин Россейде жашагъанла барысы да кёрюр ючюн, аланы башха шахарлагъа да элтирге муратлы болгъанларын билдиргенди ол.

 Проектни чеклеринде суратланы санында бизни художникле Ахматланы Лиуанны бла Сарбашланы Азнорну ишлери да кёргюзтюлгендиле. Кёрмюч бошалгъанындан сора суратчыларыбыз, Леуан бла Азнор, Миллет музейге бир ненча ишлерин саугъагъа бергендиле. Махкемени таматасы Феликс Наков да алагъа аны ючюн ыразылыгъын билдирип, бу чыгъармала мында бардырылгъан кёп кёрмючлени жасарыкъларын айтханды.