Хунерликлерин ачыкълагъандыла

Къабарты-Малкъар къырал университетде «Мистер КБГУ-2024» деген ат бла эришиу бардырылгъанды. Анга уа бу жол жетеулен къатышхандыла. Аны башламчылары уа окъуу юйню жаш тёлю политика эмда юйретиу иш жаны бла управлениясыны келечилери болгъандыла.

Эм алгъа жашла  сайлауладан ётгендиле, кеслерини юслеринден презентацияла этип, аланы видеогъа алдыргъандыла, спонсорланы излегендиле, жюрини къауумун да тохташдыргъандыла. Бек сейири уа чыгъармачылыкъ жаны бла эришиу болгъанды.
Жаш адамла кеслерини хунерликлерин ачыкълай, сёз ючюн, аскерчиле походда къалай солугъанларын кёргюзтгендиле, эрттегили халкъ жырланы да айтхандыла. Бир-бирлери уа тепсеген да этгендиле, къобузда сокъгъанла да болгъандыла. «Хип-хоп», «брейк» дегенча тепсеулени билгенлерин кёргюзтгенле да бар эдиле.

Эришиуге къатышханлагъа, баям, соруулагъа жууапла берирге керек бёлюм къыйыныракъ кёрюннген болур. Мында чам, лакъырда эте билгенлерин, бир тюрлю болумну оюн халгъа буралгъанларын ачыкъларгъа керек эдиле.
Ызы бла жашла «Дипломат» атлы тюкенни быстырларында чыкъгъандыла сахнагъа, тойлагъа, къурманлыкълагъа къалай кийинип барыргъа тийишлисин да кёргюзтгендиле.

Жюрини келечилерини оюмларына кёре уа, къараучуланы саугъалары Асанланы Тамирланнга жетгенди. Ол КъМКъУ-ну педагогика колледжини окъуучусуду. «Мистер КБГУ-2024» деген атха уа жалгъан интеллект эмда тарихли технологияла   институтну студенти Султан Кишев тийишли болгъанды.