Жангылыкъла

Миллетибизни адабият дуниясы энтта да бир китап  бла байыкъланнганды. Бир ненча кесекден къуралгъан  «Унутулмасын халкъымы эсинде» деген  чыгъарманы автору  огъарымалкъарлы Бичиланы Османны жашы Хусейди.

Кёп болмай Москвада  «Сколково» технопаркда  «Ачыкъ инновацияла» деген тогъузунчу  халкъла аралы  форум болгъанды.  Быйыл ол биринчи кере онлайн  халда ётгенди. Анга  Къабарты-Малкъар къырал университетни келечилери да къатышып полимер материалла бла байламлы  къыйматлы инновация проектлерин кёргюзтгендиле.  Аны юсюнден бизге  вузну пресс-службасындан билдиргендиле.

Быйыл Къабарты-Малкъарда кюзлюк рапс  3,5 минг гектаргъа себилликди, былтыр бу заман бла тенглешдиргенде, ол 3,5 кереге кёпдю, деп билдириледи КъМР-ни Эл мюлк министерствосуну пресс-службасындан.

Халкъыбызны белгили назмучусу Бегийланы Абдуллах бу кюнледе  70-жыллыгъын белгилейди. Миллетибизни фахмулу келечисини юбилейине жораланнган конкурс бу кюнледе жаш къауум кенг хайырланнган Инстаграм социальный сетьде  башланнганды. Аны бардырыуну баш мураты ёсюп келген тёлюге поэтни чыгъармачылыгъы бла шагъырейленирге болушууду.

Урлукъгъа жараулу картофну кюз эмда къыш кезиуледе тийишлисича сакъларгъа керекди. Жылы кюн жыйылгъан, кеси да иги къургъакъ болгъан  битимни олсагъат уругъа тёгюп къояргъа жарамайды, дейдиле Россельхознадзорну Къабарты-Малкъарда эмда Шимал Осетия-Алания республикада Управлениясыны специалистлери.

Республиканы кёп къалмай битеу районларыны жолларында шёндюледе иги кесек жангыртыу эмда тапландырыу ишле бардырыладыла. Къыш сууукъла келгинчи подряд организацияланы специалистлери алада чунгурланы жамап бошаргъа керекдиле.

Кёзге артыкъ кёрюнмегенликге, магъанасы  уллуду

Жыл сайын онтёртюнчю октябрьде  битеу дунияда да  Стандартизацияны халкъла аралы кюнюн белгилейдиле. Бу дата бирикген стандартланы  магъаналылыкъларына адамла эс бурур аны бла бирге быллай иш бла кюрешген специалистлени усталыкъларын белгилер ючюн къуралгъанды.

«Ростелеком» Къабарты-Малкъарда берген Интернет связьны  хайырланыучуланы саны бу кюнледе 80 мингнге жетгенди. Аладан 60 процентине бу жумуш оптика ызла бла бериледи, дегендиле компанияда.

Къабарты-Малкъарда сабийлени школгъа дери билим бериу учреждениялада жерле бла жалчытырча аслам эс бурулады,  ол санда Чегем районда да.  Анга кёре  Мир, Шалушка эм Звёздный  элледе да  180 сабийге ясли блокла ишлене турадыла, деп билдириледи муниципалитетни администрациясыны  пресс-службасындан.

Кёп болмай Къабарты-Малкъарда Битеуроссей халкъ фронтну (ОНФ) келечилери жамауатны тилеги бла Нальчикде Дагъыстан орамда 41-чи номерли гимназияны къатында иеси эс бермеген,  атылгъан къурулушну тийресин тинтгендиле. Аны кезиуюнде мында мияладан, темирден эм башха материалладан  аслам къалгъан-къулгъан  жыйылгъанын, ол санда аслам хайыуан  мыллыкла болгъанларын да  тинтгендиле.