Жангылыкъла

Къабарты-Малкъар къырал университетни Элбрус районда окъутуу-илму комплексинде «Электроникада микро- эмда нанотехнологияла» деген онбиринчи халкъла аралы илму-техника конференция бардырылгъанды.

Донорну битеудуния кюнюнде (14 июнь) Черек районда танымагъан адамларыны саулукъларына эмда жашауларына себеплик болур ючюн къан берирге келгенле аз тюйюл эдиле.

Майский шахарны 14-чю номерли орта школунда сабийлеге жай солуу кезиуде электрокючню къоркъуусузлу хайырланыучуну юсюнден дерс бардырылгъанды. Тёртюнчю классны тауусханла бла районну электросетини электромонтёру Виктория Базылева тюбешген эди, деп билдиргендиле «Каббалкэнергону» пресс-службасындан.

Электросетьледе къоранчланы азайтыуну, алада ремонт ишлени бардырыуну, ток ючюн тёлемей тургъанланы жууапха тартыуну юсюнден сёлешгендиле «Каббалкэнергода» бардырылгъан кенгешде. Аны ишине районланы электросетьлерини башчылары да къатышхандыла, деп билдиргендиле компаниядан.

РАН-ны Къабарты-Малкъарда илму арасында медицинада хайырланырча цифралы  томосинтез эталлыкъ кёп функциялы рентген комплексни жарашдырыу бла кюреше турадыла, деп билдиргендиле учреждениядан.

Илму арада айтханларына кёре, шёндю бек кенг хайырланылгъан диагностика амалгъа рентгенография саналады. Алай аны бир кемчилиги барды – ол шаугютлени бла сингирлени  хазна кёргюзталмайды. Аны уа сагъынылгъан комплекс бек тынгылы тамамларгъа керекди.

КъМР-ни Кёп функциялы арасында Ич ишлени министерствосуну республикада бёлюмлерини келечилери бла тюбешиу болгъанды. Сёз анда МФЦ, миграцияны вопрослары жаны бла Управление, Информация ара эмда къырал автоинспекция бла бирге ишлеуню юсюнден баргъанды, деп билдиргендиле учрежденияны пресс-службасындан.

16 июньда Урван районну «Аруан» технопаркында ралли-спортдан «BEAST RACE 2019» деген ат бла республиканы жай кубогу бардырыллыкъды, анга хар сюйген къатышаллыкъды.

Багъалы шуёхла!
Ана тилибизде чыкъгъан газетибиз  къыраллыгъыбызны белгилеринден бириди. Аны таулу юйюрледе болууу, кёрюнюую къууанчды, ёхтемликди

Черек районну  жер-жерли администрациясында Социал ишчини кюнюн  къууанчлы белгилегендиле. Анга жораланнган жыйылыугъа  район администрацияны башчысыны орунбасары  Къазийланы Анатолий,  Къашхатауну оноучусу Уяналаны Азрет,  иш бла жалчытыу эм социал  къоруулау  араны  директору  Батчаланы Алим,    социал жумушланы тамамлаучсу  комплекс араны директору Улбашланы Миналдан  да къатышхандыла.

РФ-ни монополиялагъа къажау службасыны Къабарты-Малкъарда Управлениясында (УФАС) бардырылгъан кенгешде сёз конкуренцияны айнытыуну юсюнден баргъанды. Анга КъМР-ни Экономиканы айнытыу министерствосуну келечилери да къатышхандыла, деп билдиргендиле ведомстводан.