Жангылыкъла

Роспотребнадзорну КъМР-де Управлениясындан билдиргенлерича, бизни республикада грипп эмда ОРВИ бла ауругъанланы саны озгъан ыйыкъда эпидемия мардадан 61,5 процентге аз болгъанды. Нальчикде уа бу кёрюмдю 13,8 процентди.

"Саулукъ"  миллет проектге тийишлиликде Къабарты-Малкъарда  "Родовой сертификатла" деген программа жашауда бардырылады. Анга  акушерство эм гинекология  неда педиатрия  жаны бла ишлерге  лицензиялары болгъан эмда РФ-ни  Социал страхование фондуну   регион бёлюмю бла келишим этген  больницала  къошулургъа  эркиндиле.

    Къабарты-Малкъар Республиканы Нальчикдеги аскер комиссариаты 2019 жылда Россей Федерацияны Къоруулау министерствосуну, башха министерстволаны бла ведомстволаны бийик билим берген аскер окъуу юйлерине кирирге сюйгенлени араларында сайлаула башланнганларын билдиреди. Аны юсюнден толу хапар билир ючюн аскер комиссариатха келирге керекди. Аны адреси: Нальчик ш., Вологиров ор.,26 (45-чи номерли кабинет).

Кёп болмай Къабарты-Малкъар къырал университетде  «Leisurebusinesstravel» тюрк компанияны   таматасы Илимдар Риза  студентле бла тюбешгенди эмда туризм жаны бла бизнесни къурауну, ол жетишимли ишлерча не этерге керек болгъаныны юсюнден ушакъ бардыргъанды.

Жашау-журт коммунал мюлкде предприятияланы ишини, бу сферада берилген жумушланы юсюнден билдириу эмда ангылашынмагъан затланы кетерир умутда Нальчикде Главпочтамптны залында хар ай сайын «ачыкъ эшиклени» кюню бардырылады. Анга тёрели халда тюрлю-тюрлю ведомстволаны, ол санда КъМР-ни Энергетика, тарифле эмда жашау журтлагъа надзор этиу жаны бла министерствону келечилери да къатышыучудула.

Бахсанда  Катханов орамда 5,5 гектар жерде багуш жыйылыпды. Кёп болмай анда ишчи комиссия болгъанды. Ары баргъанланы санында шахарны администрациясыны башчысы Мамхегов Хачим эм башхала болгъандыла.

Россейде ишлерин эм иги билген бухгалтерле къайда уруннганларын  билир ючюн  «Консалтинг Групп»  компанияны специалистлери рейтинг къурагъандыла. Анга кёре Шимал Кавказны тёрт регионуну бухгалтерлери беш биринчи тизмеге киргендиле. Биринчи  жерни Ингушетия  алгъанды.  Чечен - экинчи, Шимал Осетия - ючюнчю, Къабарты-Малкъар - тёртюнчю эм Вологод область  бешинчи жерге тийишли болгъандыла.
   

«Газпром газораспределение Нальчик» компанияны специалистлери былтыр бардыргъан рейдлени кезиуюнде, газ ызлагъа эркинликсиз къошулгъан 412 шарт ачыкълагъандыла. Ол санда 54-сю къайтарылып этилген бузукълукъладыла, деп айтылады компанияны интернет-сайтында.

Бюгюнлюкде Россейде миллет тилледе 2,5 минг газет чыгъады. Аланы  22 проценти уа Татарстанда басмаланады. Алай бла шёндю бу республикада 574 газетни анда жашагъан халкъланы тиллеринде окъургъа боллукъду. Аны юсюнден регионну «Татмедиа» басма эм асламлы информация коммуникацияла агентствосу билдиреди.  

Нальчикде «скорыйле» жетишмегенлерини юсюнден ТАСС агентствону энчи корреспонденти Герийланы Асият билдиреди. Аны сылтауу шахарда кесекледен  ауругъанланы саны ёсгениндеди.