Экономика

Бизни республикада Россейни Ара банкыны къыбыла бёлюмю къурагъан «Финанс билим» деген соруу бардырылады. Ол 14 октябрьге дери боллукъду, анга къайсы бирибиз да къатышаллыкъбыз.

Къабарты-Малкъарда быйыл сегиз айгъа эл мюлк бёлюмде къармашхан предприятияла  25,7 миллиард сом багъасына продукция чыгъаргъандыла. Былтыр бу заман бла тенглешдиргенде, ол 103,7 процентге асламды, деп билдиредиле  Кавказстатдан.

Россейде быйыл биринчи июльдан башлап, дарман препаратлагъа, аякъ кийимлеге, тютюн продукциягъа энчи белгиле (маркировка) салып тебирерге керекди. Ансыз аланы сатаргъа жарамайды. Жаланда ары дери чыгъарылгъан дарманланы къоярыкъдыла; аланы хайырланыргъа жараулу болжалы кетгинчи.

Кёп болмай Россей Федерацияны эл мюлк министрини орунбасары Елена Фастованы башчылыгъы бла  видеоконференция халда кенгеш болгъанды. Ол   эл мюлк производительлеге къыралдан болушлукъ этиу къалай бардырылгъанына жораланнганды.  Анга регионлда профильли ведомстволаны таматалары, ол санда  Къабарты-Малкъардан Хасан Сижажев да къатышханды. Аны юсюнден  КъМР-ни Эл  мюлк министерствосуну пресс-службасындан билдиргендиле.

Бизни республикада адамланы эмда жюклени женгил такси бла ташыргъа эркинлик берген къагъытны, кеси алларына абери бла кюрешгенле, предпринимательле эмда башхала юридический статус алгъандан сора жарашдырыргъа боллукъдула.

Быйыл сентябрьде  чыгъарылгъан эсеплеге кёре, озгъан алты айгъа  Россельхозбанкны Къабарты-Малкъарда бёлюмю (РСХБ) гитче эм орта бизнесни келечилерине  350 миллион сомгъа жууукъ ёнкюч бергенди. Ол санда кезиулю эл мюлк ишлени бардырыргъа 190 миллион  сом. Саулай айтханда уа,  бюгюнлюкде 200 миллион  сом багъасына заявка берилгенди.

Къабарты-Малкъарда сегиз айгъа   агропромышленный комплекс (АПК) бёлюм бла байламлы товарладан экспорт жылгъа белгиленнген планны   90 процентинден  асламгъа  толтурулгъанды. 

Быйыл  Къабарты-Малкъарда  63 минг гектар чакълы бир жерге къышлыкъ мирзеу  себилликди.  Ол былтыр бу заман бла тенглешдиргенде,  108 процентге асламды, -деп билдиредиле  КъМР-ни  Эл мюлк,  министерствосуну пресс-службасындан.

Къабарты-Малкъарны предпринимательлеге болушлукъ тапдыргъан арасыны эл мюлк  жаны бла бёлюмюне «Фермерлеге болушлукъ тапдыргъан системаны къурау эм эл кооперацияны айнытыу» деген программаны чеклеринде юч миллион сом бёлюннгенди, деп билдириледи КъМР-ни Экономиканы айнытыу министерствосуну пресс-службасындан.

Чегем районда алманы къыстау жыйып башлагъандыла. Мында саулай  2768 гектар чакълы да ёседиле терекле, деп билдириледи КъМР-ни Эл мюлк министерствосуну пресс-службасындан.