Экономика

Тырныауузда алтынны къазып эм магъаданны  жарашдырып башлауну проектине 50 миллиард сом къоратыллыкъды, деп билдиргендиле республиканы Башчысыны администрациясында.

Къабарты-Малкъарда быйыл февральда багъала нечик тюрленнгенлерин Росстат тохташдыргъанды. Аны тергеулерине кёре, январь бла тенглешдиргенде, товарланы бла жумушланы багъалары 1,1 процентге ёсгендиле (бегирек да аш-азыкъла - 1,92%).

23 мартдан башлап химия затла къошулмай ёсдюрюлген битимлени, кёгетлени сайлар муратда битеуроссей къол кётюрюу башланнганды. Жамауат «Халкъ сайлагъан органика бренд» деген номинациягъа къатышханланы айырлыкъдыла. 

Къабарты-Малкъарда "Юйюр" миллет проектге кёре иги кесек  иш бардырылады.  Билим бериуню юсюнден айтханда, былтыр  муниципалитетледе сабийле  школгъа дери жюрюген  юч  учрежденияны ишлерге белгиленнген эди. Анга кёре,  бюгюнлюкде Кёнделенде жюз сабийге садикни къурулушу къыстау барады, деп билдириледи

Жууукъ заманда «Жашау этерге инфраструктура» миллет проектге кёре, Нальчикде, Майскийде эм Чегемде  жамауат жерлени игилендириу жаны бла ишле башланырыкъдыла. Аланы проектлери былтыр иги шахар  болум къурау жаны бла битеуроссей конкурсда хорлагъандыла.

КъМР-ни Къурулуш эмда  жашау журт-коммунал мюлк министерствосундан билдиргенлерича, былтыр ишлеп башлагъан   "Коммунал инфраструктураны жангыртыу"  федерал проектге кёре, жылны ахырына дери  таза суу бла жалчытырча иги кесек жумуш тамамланнганды.

Шимал Кавказ федерал округда гитче эмда орта бизнес бла кюрешгенле МСП Корпорацияны Миллет гарантияла системасыны хайырындан былтыр 42,6 миллиард сом къоллу болгъандыла. Буруннгу жыл бла тенглешдиргенде ол жети процентге кёбюрекди, дегендиле Къабарты-Малкъарны Экономиканы айнытыу министерствосунда.

Россейни  Социал фондуну тергеулерине кёре, быйылны январь айында къыралны регионларында тёленнген пенсияланы араларында башхалыкъ 23 327 сомгъа жетгенди. Башхача айтханда, бир-бир регионлада пенсиячыла 23 минг сомгъа кёп  аладыла.

Предприятияла бла организацияла 223-ФЗ законну излемлерин толтура, къырал берген ахчагъа кеслери иш къурап къармашханладан былтыр саулай Россейде 48,3 миллиард сом багъасына абериле сатып алгъандыла. Буруннгу жыл бла тенглешдиргенде, ол тёрт кереге кёп окъуна болгъанды. Этилген келишимлени саны уа ючден бирине кёбейип, онеки мингден атлагъанды.

Быйыл Къашхатауда  «Къабарты-Малкъарны транспорт системасын комплекс халда айнытыу» программагъа кёре 3,5 километр чакълы бирде  автомобиль жоллагъа тынгылы ремонт этилликди.