Календарь событий

КПРФ политика партияны Ара комитетине кирген сенатор Айрат Гибатдинов РФ-ни юстиция министри Константин Чуйченкогъа тилек къагъыт жазгъанды. 

Къадырланы Мухажир, баям, биринчи малкъарлы лётчик окъуна болур эди. Россейни Къоруулау министерствосуну Ара архивинден билдиргенлерине кёре, ол 1931 жыл Москвада 10-чу кавалерия дивизионуну полковой школуну курсанты болгъанды. Андан сора Ейск шахарны Сталин атлы тенгиз лётчиклени аскер школунда окъугъанды.

Бурун заманлада  малкъарлы тиширыула жыгыра тузну жарашдырып, аны уста хайырланып болгъандыла. 

Къабарты-Малкъар къырал аграр университетде экономистни кюнюн белгилеуню чеклеринде къууанчлы жыйылыу ётгенди. Вуздан билдиргенлерине кёре, аны бла ала бу усталыкъны магъанасын, тийишли билим хар кимге да керек болгъанын чертирге умут эте эдиле.

Кёп болмай «Газпром межрегионгаз Нальчик» компанияны Чегем  районда бёлюмюню специалистлери  сюд приставланы эм полицияны келечилери бла бирге Чегем районда рейдле бардыргъандыла. Аланы кезиуюнде   Чегем шахарда, Экинчи Чегемде, Шалушкада эм Лячинкъаяда   88 абонентни жокълагъандыла. Компаниядан билдиргенлерине кёре, быллай амалны баш  борчу тёлегенлени санына къошулурча этерге эм  игилик бла ангылмагъанланы   законну чеклеринде  жууапха тартыргъады. 

Къабарты-Малкъарны мюлклеринде чууакъ кюнлени керексизге жибермей,  нартюхню оруп кюрешедиле. Районлада эл мюлк управленияларындан билдиргенлерича,  мирзеу бла къудору битимледен 985 минг тонна жыйылгъанды, ол санда мирзеулюк  нартюхден   671,5 минг тонна  жыйылгъанды.  Бюгюнлюкде ол 100 минг гектарда неда 90 процентге кетерилгенди.   

Бизни республикада мюлклени бар тюрлюлеринде быйыл биринчи тогъуз айны ичинде 173,8 миллион тауукъ жумуртха жыйгъандыла.

Къабарты-Малкъарда «Жашау этерча  инфраструктура» миллет проектге кирген «Коммунал инфраструктураны жангыртыу» федерал программагъа  кёре  2025-2027 жыллада ичер суу бла жалчытырыкъ  22 объект ишленирикди неда  жангыртыллыкъды.   Аладан 14-сю муниципалитетлеге жетеди, деп билдириледи КъМР-ни Къурулуш эмда жашау журт-коммунал мюлк министерствосуну пресс-службасындан.

Булутлу жазгъы эрттен Жамиляны жарсыулу халине болмагъанча бек ушай эди. Элде жашагъан сюйген жашы Сагъыт бла айырылгъанлы, къызны бир жукъ да къууандырмайды. Хар не да, хар ким да анга эриши кёрюнедиле. Сюйген ишинден окъуна зауукълукъ тапмай эди. Аны себепли къыз эки ыйыкъгъа солуу кюнле алып, таулагъа кетеди. Телефон тутмагъан, адам болмагъан гитче юйчюкде аны жюреги шошлукъ табыпды, къарамы уа бийик къая жухланы башларындагъы мамукълу булутчукъланы санайды. Алай бир такъыйкъадан эсине биягъы ол кюн тюшюп, аны мудахлыкъ бийледи…

Бардыла жер жюзюнде аллай поэтле, халкъны жюрегине сингип, заманны барыуу аланы унутдуралмагъан. Ол шайырланы жазгъанларын а къачан окъусанг да, ала магъаналыкъларын тас этмейдиле, бютюн жангы бояулу боладыла.