Билим

Тау эллерибизни мектеплеринде сабийлеге билим бериуге, адет-намысха юйретиуде да къаты къаралады. Хушто-Сыртда бу иш къалай къуралгъаныны, къаллай жетишимле эм чурумла болгъанларыны юсюнден аны школуну директору Къожакъланы Малик айтханды.

 Сабийлеге, жаш тёлюге тынгылы билим бериу айныуну жолунда барыуну баш жоругъуду. Терс-Къолда мектепледе юйретиу къалай къуралгъаныны юсюнден бизни бла ушагъында элни орта школуну директору Залийханланы Лейля айтханды.

Кичибалыкъчы къызчыкъ Хаджиланы Мариям элде битеулю билим берген мектепни алтын майдалгъа бошагъанды. Къабарты-Малкъар къырал университетни социал-гуманитар институтуну тарых ызына окъуугъа кирип, бакалавриатны къызыл дипломгъа тауусханды.

Узакъ тау элде ёсген жаш тёлю окъуу махкемеледе билим алып, артда ызларына къайтып ишлерге итинселе, аллай шарт кёллендирмей къоймайды. Нек дегенде туугъан, жашагъан да эллерин айнытырыкъ, аны тамблагъы болумун игилендирлик, жамауатны мурдорун къурарыкъла да аладыла – бюгюннгю жаш тёлюбюз.

Алгъаракъда «Ёз тилни эмда ана литератураны эм ахшы устазы» деген ат бла Битеуроссей усталыкъ эришиуню республика даражалы уруму озгъанды. Эсигизге салайыкъ, ол РФ-ни Жарыкъландырыу министерствосуну эмда Россейни Халкъларыны ёз тиллерини федерал институтуну башламчылыкълары бла быйыл экинчи кере бардырылады.

Биринчи сентябрьден башлап Къабарты-Малкъарны окъуучулары Ата журтубузну тарыхын жангы китапла бла окъурукъдула. Тамата класслагъа тарыхдан китап къырал даражасы болгъан бирикдирилген дерсликге саналлыкъды.

Тамата класслада халкъ чыгъармачылыкъны окъутуугъа, аланы жанр энчиликлерин белгилеуге уллу эс бурулады. Нарт эпосну, таурухланы, жырланы тинте, окъуучулагъа тежей, устаз алада зорлукъ бла огъурлулукъ, кишилик бла хомухлукъ къалай сермешгенлерин ачыкълайды, теория, жамауат, миллет сезим бла байламлы сорууланы салады. 

Школну неда вузну тауусханланы кёплери къайсы усталыкъны сайларгъа билмейме, деп сагъышха къаладыла. Насыпха, бюгюнлюкде алагъа себеплик этген кёп амал барды. Федерал эмда миллет проектлени (аладан бири – «Билим бериу») хайырындан жаш адамла кеси усталыкъларында сынамлы ишчиле бла танышыргъа, бирде уа сюйген ишлерин да табаргъа боллукъдула. Алагъа деп талай проект бардырылады.

Быйыл Устазны бла насийхатчыны жылын белгилеуню чеклеринде китапханачыла да анга атап, аслам ишни бардыргъанлай турадыла. Эсигизге салайыкъ, 2023 жыл сагъынылгъан белги бла Россейни Президенти Владимир Путинни буйругъуна тийишлиликде озады.

Республиканы башха жерлериндеча,  Чегем районда да «Сабийни школгъа хазырла»  деген чакъырыу бла тёрели жандауурлукъ акция бардырыллыкъды.  Аны чеклеринде  муниципалитетде къолайсыз  юйюрлеге тийишли болушлукъ тапдырылады. Бу жол  аллай Донецк бла Луганск халкъ республикаладан окъуучулагъа себеплик этилликди.