Спорт

«Динамо» спорт обществону 100-жыллыгъына аталып, Нальчикни Универсал спорт арасында дзюдодан битеукъырал эришиу бардырылгъанды. Анга Россейни 14 регионундан 23 жыллары толмагъан 180-нге жууукъ спортчу къатышхандыла.

Нальчикде эстетика гимнастикадан Россейни кубогу бардырылгъанды. Анга 21 команда къатышханды, алагъа 16 жыллары толмагъан къызла киргендиле.

Бу кюнледе Санкт-Петербургда жаш спортчуланы араларында универсал сермешледен Россейни биринчилиги бардырылгъанды. Анга 37 региондан 500-ге жууукъ спортчу къатышхандыла.

Нальчикде «Каисса» арада классика шахматладан тиширыуланы араларында эришиу бардырылгъанды. 

МВД-ны Къабарты-Малкъарда управлениясыны  патруль-пост службасыны энчи батальону жыл сайын Тетов Алимбекни хурметине  баскетболдан бардырылгъан турнирге къатышады. 2010 жылны 9  майында полицияны лейтенанты Алимбек Муаедович «Кавказ» федерал трассаны  429-чу километринде орналгъан «Баксан» постда аскер борчун толтура тургъанлай аманлыкъчыланы къолларындан ёлгенди.  

Одинцово шахарда каратени битеустил тюрлюсюнден Федерацияны кубогу бардырылгъанды. Анга къыралны 37 регионундан 1200 спортчу къатышханды. Аны къорууланыу амалланы хайырланыу бёлюмюнде республикабызны жыйымдыкъ командасы 14 майдал къытханды.

«Спорт наркотиклеге къажауду» деген чакъырыу бла каратени зендекай будо тюрлюсюнден Къабарты-Малкъарны биринчилиги бардырылгъанды. Анга республиканы шахарларындан бла эллеринден умутландыргъан спортчула къатышхандыла.

Ленинград областьны Выборг шахарында 17 жыллары толмагъан гёжефлени араларында ауур атлетикадан Россейни биринчилиги бардырылгъанды. Анга 59 регионундан 500-ден аслам жаш бла къыз къатышхандыла.

Элбрус районну бла Кърымны араларында шуёхлукъ эм спорт байламлыкъла иги кесек заманны жюрютюледиле. Кърымдан спортчула Тырныауузда эришиулеге къатышадыла, районну олимпиада резервли спорт школуну каратеден бёлюмюнде жарау этгенле уа турнирледе эки республиканы да хурметлерине сермешедиле. 

Прималкинское элде Къабарты-Малкъарны Спорт министерствосуну себеплиги бла кикбоксингден 14 жыллары толмагъан спортчуланы араларында республиканы чемпионаты бла биринчилиги бардырылгъандыла.