Спорт

Екатеринбургда дзюдодан 23 жыллары толмагъан спортчуланы араларында Россейни биринчилиги бардырылгъанды.Алагъа 59 региондан 570 адам къатышхандыла, ала 14 ауурлукъ къауумда тутушхандыла.

Къабарты-Малкъарны Спорт министерствосунда олимпиада резервли спорт школ 2019 жылда къуралгъанды. Анга республиканы бла къыралны жыйымдыкъ командаларына спортчуланы, инструкторланы, спорт судьяланы хазырларгъа борч салыннганды.

«СК Нальчик» бассейнде жюзюуден биринчилик бардырылгъанды. Анга 80 адам къатышханды, ала 50 метрге эркин стиль, брасс, баттерфляй амалла эм аркъаларында жюзюп эришгендиле.

Кропоткин шахарда баскетболдан округ даражалы эришиу бардырылгъанды, анга СКФО-ну бла ЮФО-ну регионларындан, Волгограддан, Краснодардан, Дондагъы Ростовдан бла Кърымдан къауумла къатышхандыла.

Нальчикде спорт микс-файтдан клубла аралы турнир къуралгъанды. Микс-файт – ол единоборстволаны шёндюгюлю, къатыш эм игилендирилген тюрлюсюдю, анга уруу, бууу эм ачытыу приёмла барысы да киредиле.

Симферопольда каратеден Кърым Республиканы биринчилиги бла чемпионаты эм WSKF каратеден регионла аралы турнир къуралгъанды. Анда бизни республикадан аскер искусстволаны «Барс-Тырныауз» академиясыны юч келечиси жетишимли болгъандыла.

Дагъыстанда юниорланы, жаш эм абадан спортчуланы араларында кикбоксингден СКФО-ну биринчилиги бла чемпионаты бардырылгъандыла. Алагъа  Чеченден, Дагъыстандан, Ингушетиядан, Къабарты-Малкъардан, Къарачай-Черкесден, Шимал Осетия-Аланиядан бла Ставрополь крайдан 800-ден аслам гёжеф къатышханды.

Белгилисича, россейли спортчуланы тюрлю-тюрлю халкъла аралы эришиулеге къатышыр онглары жокъду. Бу кюнлеге дери ол чекле Олимпиада оюнла бла да байламлы эдиле. Алай бу кюнледе Халкъла аралы Олимпиада комитетни таматасы Томас Бах бизни атлетле анга къатышыргъа боллукъдула дегенди. Алай аллай амал аланы бир къауум жорукъларына бой салгъандан сора берилликди.

Владикавказда художестволу гимнастикадан «Олимпге атлаууч» деген битеуроссей эришиу къуралгъанды. Анда энчи эм къауум зачётлада 19 региондан 700-ге жууукъ спортчу эришгендиле.

Элбрус районда спорт тири айныйды, ол а бу жаны бла иш тынгылы бардырылгъаныны эсебиди. Районну Физкультура эм спорт комитетини башчысы Жаппуланы Магомет айтханнга кёре, жараулагъа тийишлисича даража берилир эм спортчула жетишимли болур ючюн, спорт школла, аскер комиссариат, ДОСААФ-ны жер-жерли бёлюмю бла байламлыкъла жюрютюледиле, арада бир бирге себеплик да этиледи.