Спорт

 «Спортмастер тёлю» деген  проектни чеклеринде бу кюнледе Зольск районда спорт-айнытыу майдан къууанчлы халда ачылгъанды. Сабийлеге эмда жаш адамлагъа деп, аллай майданла республиканы дагъыда беш  районунда   къуралгъандыла.

Нальчикде каратени WKF тюрлюсюнден 10-13-жыллыкъ спортчуланы араларында Россейни биринчилиги къуралгъанды.

Нальчикни Сабий стадионунда женгил атлетикадан регионла аралы эришиуле бардырылгъандыла. 

Тхэквондодан республиканы олимпиада резервли спорт школу 2014 жылда къуралгъанды. Школну директору Беслан Канкулов билдиргенича, алада юйреннгенле жыл санларына кёре Россейни жыйымдыкъ командаларына киредиле. «Арт кезиуде тхэквондогъа сейир ёсе барады, спортчуларыбыз да аслам болгъандыла», - дейди ол.

Орёл шахарда каратени бир  тюрлюсюнден Россейни биринчилиги ётгенди. 

Шимал Осетия-Аланияда шахматладан «Владикавказны мэрини кубогу» деген эришиу къуралгъанды. Анга къыралны аслам регионундан 200-ге жууукъ спортчу жыйылгъандыла, аланы араларында кючлю шахматчыла, халкъала аралы даражалы устала да болгъандыла, ол санда Владислав Артемьев, Евгений Алексеев, Павел Смирнов эм башхала.   

Нальчикде кикбоксингден «Шимал Кавказны шахарларыны турнири» деген битеукъырал эришиу ётгенди, ол Кишиликни орденини кавалери Чабдарланы Батырны хурметине аталып къуралгъанды.

Пятигорскда каратени киокусинкай тюрлюсюнден жашланы бла къызланы араларында Ставрополь крайны биринчилиги бардырылгъанды. Анга Къабарты-Малкъардан, Къарачай-Черкесден, Невинномыскдан, Кисловодскдан, Ставропольдан, Пятигорскдан, Ессентукиден бла Краснодардан 300 спортчу къатышхандыла.

«Спорт наркотиклеге къажауду» деген чакъырыу бла Баксаненокда женгил атлетикадан тёрели регионла аралы эришиуле бардырылгъандыла. Ала Амир, Виталий, Марат Гетоковланы, Тимур Мамиковну хурметлерине къуралгъандыла.

Элбрус районну олимпиада резервли спорт школуну бюгюнлюкде Симферопольда жарау этген каратечилери эришиуледе жетишимлери бла къууандыргъанлай турадыла.