Жамауат

«Газпром межрегионгаз Нальчик» компанияны специалистлери, жер-жерли администрацияланы келечилери бла бирге быйыл Къабарты-Малкъарда 4200 чакълы юйде болгъандыла. Ала бары да газ ючюн борчлары болгъанла эдиле. Тёлеулени заманында берселе, ол кеслерине иги боллугъун ангылатыргъа кюрешгендиле контролёрла. Дагъыда шёндюгю амалла, ол санда онлайн-сервисле бла да шагъырейлендиргендиле.

Гитче эмда орта бизнес бла кюрешгенле юридический жаны бла консультацияланы хакъ тёлемей алыргъа боллукъдула. Алагъа аллай онг МСП Корпорация ачхан «Правовой гид» платформада бериледи, деп билдиргендиле КъМР-ни Экономиканы айнытыу министерствосундан.

9 декабрь Россейде къырал байрамды  – Ата журтну Жигитини кюню. Октябрь революциягъа дери уа 9 декабрь (эски орузлама бла 26 ноябрьде) Сыйлы Георгийни жоруна тийишли болгъанланы байрамына саналгъанды. 

Ностуланы Хаджимуратны аты республикада спорт бла байламлы кенг белгилиди. Кеси заманында ол ауур атлетикада бийик жетишимле болдургъанды, артда уа, спорт учреждениялагъа башчылыкъ эте, аланы айнытыугъа уллу къыйын салгъанды.

Бусагъатда кёп юйюрле чачылыпдыла: атала вахталада, узакъ шахарлада, анала уа сабийлери бла  юйде. Айла бир бирлерин кёрмей жашау этген да сынауду, аны кётюралмай айырылгъанланы кёребиз.  Шёндю юй ишлерча ахча жыйгъан къыйынды. Къурулуш баргъан жерледе  жыйылады ахча, сабийлери болгъан юйюрле терк окъуна юй ишлейдиле.

Алтынчы декабрьде Къабарты-Малкъарны Т.К.Мальбахов атлы къырал миллет библиотекасыны миллет эм краеведение бёлюмюнде малкъар тилни бла адабиятны сюйгенлени «Тейри къылыч» клубунда «Фахмулу алим, огъурлу адам» деген тюбешиу къуралгъанды. Ол философия илмуланы доктору, профессор. КъМР-ни искусстволарыны сыйлы къуллукъчусу, Россейни Журналистлерини, Жазыучуларыны союзларыны члени, белгили алим эм жамауат къуллукъчу Эфендиланы Ибрагимни жашы Салих туугъанлы 90 жыл толгъанына аталып жыйылыу болгъанды. Аны илму-педагогика, жамауат иши къыркъ жылдан артыкъны Къабарты-Малкъар Х.М. Бербеков атлы къырал университети бла байламлыды.

Арт заманлада юйсюз итле эшикде, ол санда шахар тийреледе, аслам жайылгъанлары жамауатны жарсытхан уллу жарсыуладан бири болгъанды. Ол себепден шахарны администрациясыны башламчылыгъы бла Прохладна шосседе 130 чакълы хауле итге деп приют ишленнгенди. Аны административ юйю, итле тургъан, бакъгъан бёлюмлери эм вольерлери да боллукъду. Саулай алып айтханда, ол законодательствода белгиленнген жорукълагъа толу келиширикди.

Черкесланы Исмайылны жашы Мустафа, къызлары Халимат бла Нажабад «Заманны» алгъанлай турадыла.

Бизни жаш тёлюбюзню санында табийгъатны сюйген, аны сакълар ючюн амал этгенле бардыла. Моллаланы Малика аллай инсанларыбыздан бириди.  Ол кеси Огъары Бахсанданды, ариулукъну арасында жашагъаны себепли гитчелигинден да табийгъат бла байламлы билим алыргъа итиннгенди. КъМКъУ-ну биология бёлюмюн тауусханды, РАН-ны Тау этеклени тийрелерини экология жаны бла А.К. Темботов атлы институтуну илму къуулукъчусуду. КъМР-ни Башчысыны жаш алимлеге илму эм инновацияла жаны бла саугъасыны лауреатыды, алгъаракълада уа агъач мюлкге жораланнган илму ишин къоруулап, биология илмуланы кандидаты болгъанды. Малика Шимал Кавказда нарат тереклени тинтген биринчи алимди. Бюгюн ол бизни ушакъ нёгерибизди.

Къабарты-Малкъарны Жамауат палатасында жолда жюрюуню жорукълары (ПДД) къалай толтурулгъанларын сюзгендиле. Жыйылыуну палатаны жамауат къоркъуусузлукъ, законлукъну сакълау эм ОНК-бла байламлыкъла жюрютюу жаны бла комиссиясы бардыргъанды, анга Къыралавтоинспекцияны управлениясыны, Къабарты-Малкъарны Транспорт эм жол мюлк, Жарыкъландырыу эм илму министерстволарыны, Нальчикни администрациясыны келечилери къатышхандыла.