Инвесторлагъа таплыкъгъа

Россей Федерацияны субъектлеринде инвестициялы болумну игилендириуге эмда инвестициялы стандартны жашауда бардырыугъа жораланнган регионла аралы форум бу кюнледе «Нижегородск ярмарка» акционер обществону тийресинде ётгенди. Анга федерал эмда регион власть органланы, ишчи биригиулени эмда бизнес жамауатны келечилери къатышхандыла, деп билдиргендиле КъМР-ни Экономиканы айнытыу министерствосундан.

Бизни республикадан а анда экономиканы айнытыу министрни орунбасары Темиркан Баждугов, Сатыу-алыу – промышленность палатаны башчысы Хасан Гукетлов, «КъМР-ни айнытыу корпорация» АО-ну башчысы Чочайланы Ахмат, Нальчик шахар округну администрациясыны шахарны, курортну эмда туризмни айнытыу департаментини таматасы Наталья Илларионова, «Чегем Агро» организацияны башчысы Лев Берлин болгъандыла.

«Регионлада инвестициялы стандарт. Онгланы заманы» деген пленар сессияны кезиуюнде бизнесни эмда къыралны араларында байламлыкъланы иги жанына тюрлендириуню юсюнден ушакъ этилгенди. Дагъыда инвестициялы стандартны кийириу бла кюрешген регион къауумланы ишлерине багъа берилгенди. Форумгъа къатышханланы барына да тематикалы мастер-классла бардырылгъандыла, бай культура программа да хазырланнганды.

Регион инвестициялы стандарт кийирилгеннге саналгъан жетмиш регионну санында Къабарты-Малкъар да барды. Аны тамамларча мында инвестициялы декларация къабыл этилген эди. Проектлени жашауда бардырыргъа себеплик этиу бла сагъынылгъан Корпорация кюрешеди. Ол кеси да 2006 жылдан бери ишлейди. Дагъыда КъМР-ни Башчысында инвестицияла эмда предпринимательство жаны бла Совет къуралгъанды. Ол да бу сферада жумушлагъа кёз-къулакъ болгъанлай турады.

Республиканы инвестициялы картасын къурар умутда былтыр, Россейни Экономиканы айнытыу министерствосуну тийишли системасына, бизде бардырыла тургъан эмда энди бардырыллыкъ проектлени, дагъыда ресурс онгланы, инфраструктураны да юсюнден информация жиберилгенди.

Инвесторлагъа таплыкъгъа деп Къабарты-Малкъарны инвестициялы порталында (https://invest.kbr.ru/investitsionnyy-standart.php) толу информация барды.