Багъыуну къыйматын кётюрюрча

Кёп болмай Нальчикде Россейни къыбыла жанында нефрологланы алтынчы илму-практика конференциялары болгъанды. Ол республикада сабий нефрология ара ачылгъан кюннге тюшгенди.

Конференцияны башлай, КъМР-ни саулукъ сакълау министри Рустам Калибатов бюгюнлюкде сабийлени арасында бюйреклери ауругъанла танг кесек болгъанларын айтып, регионда нефрология ара ачылгъаны бла гитче саусузлагъа тийишли болушлукъ тапдырыргъа онг чыкъгъанын чертгенди.
Жыйылыуда Россейни нефрологларыны ассоциациясыны президенти, медицина илмуланы доктору, Москва областьны М.Ф. Владимирский атлы илму-излем институтну трансплантология, нефрология эм жалгъан органланы кафедрасыны таматасы Андрей Ватазин да сёлешгенди. Ол айтханнга кёре, Къабарты-Малкъарда бюйреклерин алышындырыргъа керек сабийлеге тийишли онгла жаланда мында къуралгъанын чертгенди.
Форум эки кюнню барлыкъды. Аны чеклеринде экспертле нефрология жаны бла танг кесек соруугъа къарарыкъдыла.

Билимни, сынауну да кючлерча

Аны бла бирге бу кюнледе КъМР-ни саулукъ сакълау министри Рустам Калибатов «Вершины Кавказа» деген халкъла аралы форумгъа да къатышханды. Ол Къабарты-Малкъар къырал университетде «Стоматология» бёлюм ачылгъанлы отуз жыл толгъанына жораланнганды. Аны ишине Россейни эм тыш къыралланы белгили   специалистлери къатышхандыла. 
Рустам Михайлович билимни байыкъландырыуда эм сынамны кючлеуде форумну республикагъа уллу магъанасы болгъанын айтып, жерлешлерибизни анга тири къатышыргъа чакъыргъанды. Ызы бла ведомствону таматасы республиканы Саулукъ сакълау министерствосуну атындан КъМКъУ-ну Стоматология эм жаякъ-бет хирургия институтуну келечилерин сыйлы грамотала бла саугъалагъанды.
Форумну магъанасы – тишлеге багъыуну жангы излемлеге кёре бардырыр ючюн, бюгюннгю бийик технологияланы хайырланыргъа юйрениргеди.