Жорукъланы сакълагъан файдалы болур

Жолда жюрюуню жорукъларына этилген бузукълукъла ючюн тазирни  заманында тёлеген  инсан къаллай хайыр алады, аны ёлчемин къалай азайтыргъа боллукъду? Соруулагъа жууапланы КъМР-де МВД-ны УГИБДД-сыны пресс-службасындан бергендиле.

Алай бла тазир чыгъарылгъандан сора аны 20 кюнню ичинде тёлеген кезиуде ахчаны жартысын берирге эркин этилгенди. Алай бла уа   сюд приставланы борчлары болгъанланы тизмелерине тюшмей къалыргъа онг барды.

 Тазир салыннганын къалай билирге боллукъду?  Аны жолда бузукълукъ ючюн къыралавтоинспектор жазаргъа, неда УГИБДД-ны видеокамералары эсепге алыргъа боллукъдула.  Бу кезиуде уа борчугъузну юсюнден шартла Госуслуги порталда басмаланырыкъдыла. Дагъыда тазирни болгъанын бла къалгъанын ГИБДД-ны сайтында «Тазирле» деген бёлюмде табаргъа  онг барды.  Неда 8 (8662) 49-58-44  телефон номерге сёлешип билирге да боллукъду битеу шартланы.

Ахчаны жартысын не кезиуде тёлерге жарайды? Башында сагъыннганыбызча, административ бузукълукъну юсюнден бегим чыгъарылгъандан сора 20 кюнню ичинде.  Бу болжалдан  сора уа ахчаны толусунлай берирге тюшерикди.   

Алай бу низам бла   хайырланыргъа жарамагъан кезиуле да бардыла. Ол санда жорукълагъа бузукълукъ этген водитель кеф болгъаны тохташдырылса, неда ол медицина тинтиуледен ётерге унамаса.  Дагъыда светофоргъа бойсунмай, къызыл белгиге ётгенде, «стоп-линия» белгини аллында тохтамагъанда (бузукълукъну къайтарып этсе) берилмейди  бу женгиллик.

Энтта бу кезиуледе да тазир азайтылмайды: эркин этилген мардадан 40-60, 60-80 эмда 80-ден аслам километрге  къызыу баргъанда (бузукълукъ къайтарылып этилсе), аллына келген машиналаны жолуна чыкъгъанда, эсепге тийишлисича салынмагъан транспортда жюрюгенде. Къайтарылып этилген бузукълукъну уа къалай ангыларгъа боллукъду? Бир кере жууапха тартылып, жылны ичинде ол энтта  этилсе. Ол кезиуде тазирни ёлчеми азайтылмайды.

Тазирни тёлемей къойсам а?  Ахчаны административ жууапха тартыуну юсюнден бегим чыгъарылгъандан сора 60 кюнню ичинде берирге керекди. Дагъыда бегим терс жазылгъаны юсюнден тарыгъыуну хазырларгъа да 10 кюн барды. 71 кюнден сора уа РФ-ни КоАП-ыны 20.25 статьясы кючюне киреди.

Анга кёре уа, борчну заманында бермегенде, аны  ёлчеми эки кереге кёбейтиледи. Неда аны толтурмагъан инсанны эркинлиги 15 кюннге сыйырыргъа, ол 45 сагъатны борчлу халда хакъсыз ишлеге тартылыргъа боллукъду.  Андан сора да инсан Россейден тышына чыгъаргъа эркин тюйюлдю. Борч 10 мингден озгъан кезиуде уа машинаны жюрютюрге эркинлиги сыйырылады.

Эсигизге салайыкъ. Машинагъызны сатып, жангы иеси аны кесини аты бла эсепге салмаса, ол жолда этген бузукълукъла ючюн тазирле сизге келликдиле. 

Алай бла тазир чыгъарылгъаныны юсюнден билген хайырлыды. Алай   жолда жюрюуню жорукъларын сакълагъан а андан да файдалыды!

Басмагъа Тикаланы Фатима хазырлагъанды.
Поделиться: