Сууукълада апчымазча

Жашау журтлада от тюшюулени асламыны сылтауу жылытыу приборланы хайырланнганда жорукъла бузулгъанлары бла байламлыдыла. Къабарты-Малкъарны От тюшюуге къажау-къутхарыу службасыны къуллукъчулары кюз арты-къыш кезиуде юйлени жылытып башларны аллында печьле бла ожакъланы къалай ишлегенлерин тинтирге, кемчиликле бар эселе, аланы кетерирге, къурумдан тазаларгъа, жарылгъан жерлери бар эсе, аланы жамаргъа кереклисин эсгертедиле.

От тюшюуле печь асыры бек къызгъаныны хатасындан да боладыла, бирле уа аны жандыргъанда терк къабыннган затланы хайырланадыла. Ол да къоркъуулуду.  Дагъыда  отну жандырып, анга къарамай  къойгъанла да бардыла. Къыш сууукъланы кезиуюнде печьле, сау кюнню ишлеп, асыры  бек къызадыла. Мебель, эшик, терезе жабыула анга жууукъда орналсала уа, кюйюп башларгъа боллукъдула.

От ёчюлтюучюле жылытыу приборла бла, ол санда ток бла ишлеген, хайырланнганда къоркъуусузлукъну жорукъларын эсгертедиле. Биринчиден, ток ызланы, розеткаланы къалай ишлегенлерин тинтип турургъа тийишлиди, жылытыу приборланы кече токдан чыгъарыргъа керекди. Дагъыда аланы бояула, лак, алача терк къабыныргъа боллукъ затла асыралгъан жерде жандырыргъа жарамайды.

Сууукъла келгенлей, адамла жашау журтларын электропечьле бла жылытадыла. Алай бла уа ток ызланы хайырланыу кёбееди. Ала эски болсала, неда бирден кёп приборла жандырылсала, проводка кюерге болады. Андан сакъланыр ючюн юйде от тюшюу башланнганыны юсюнден билдирген приборла салдырыргъа боллукъду. Ток ызланы, розеткаланы жангыртыргъа, жылытыу приборланы тап халда  тутаргъа, аланы эшик, терезе жабыула, мебель, алача терк къабыныргъа боллукъ затладан узакъда салыргъа тийишлиди. Юйден чыкъгъан заманда битеу приборланы токдан чыгъарыргъа керекди.

- Печь, ток бла ишлеген жылытыу приборла бла хайырланнган кезиуде сакълыкъ магъаналыды. От тюшгенин кёрсегиз, мычымай къутхарыучуланы чакъырыгъыз – 01,  мобильный телефондан 101 неда 112 телефон номерлеге сёлешип. Юйде  адамланы барысын да тышына чыгъарыргъа, онг бар эсе, отну ёчюлтюп башларгъа боллукъду,-деп ангылатхандыла От тюшюуге къажау-къутхарыу службадан.