Фатарны сатханда чурумла чыкъмазча

Республиканы Кадастр палатасында юйню сатаргъа неда хаух берирге къалай хазырланыргъа кереклисин, аны ючюн къаллай справкала бла документле изленириклерин ангылатхандыла.

Палатаны юрисконсульту Ирина Карданова билдиргенича, инсан тепдирилмеген хазна бла сатыу-алыу ишле бардырыргъа умут эте эсе, эм алгъа, къолунда болгъан документледе халатла болгъанларын бла къалгъанларын, ала къырал реестрде белгиленнген данныйлеге келишгенлерин тохташдырыргъа борчлуду. Объектни юсюнден битеулю информацияны онлайн халда Росреестрни сайтында табаргъа боллукъду, алай энчи данныйле керек эселе, выписка изленирикди. Выписканы орунуна информация алыргъа эркинлик берилмегенини юсюнден билдириу келген эсе, ол объект кадастр эсепде болмагъаныны шартыды. Быллай болумлада аны эсепге салыргъа эм иеси болгъаныгъызны бегитирге тийишлиди. Выпискада иени юсюнден данныйле белгиленмеген эселе уа, ала къырал ресстрде да жокъдула. Халны тюзетир ючюн, фатаргъа неда юйге ие болгъаныгъызны эсепге салдырыргъа керекди. 

Халат жиберилгени ачыкъланса, аны тюзетирге тийишлиди. Аны ючюн эсеплеу-регистрация органнга техника халатны тюзетиуню юсюнден заявленияны эм анга шагъатлыкъ этген документни элтигиз. Сёз ючюн, иени атында, тукъумунда халат бар эсе, заявлениягъа паспортну копиясын къошугъуз. Техника халатны Кёп функциялы арада, Росреестрни сайтында неда къырал жумушланы порталында тюзетирикдиле. Ол жумушха юч ишчи кюн кетерикди, анга къырал пошлина тёленмей ди. Техника халатны тюзетиуню юсюнден заявленияны хар сейири болгъан инсан бераллыкъды.

Фатарны сатар ючюн, инсаннга мюлкню иеси болгъанына шагъатлыкъ къагъыт керек боллукъду, юлгюге сатыу-алыу келишим, юйню къурулушуна къошулгъаныны, ол анга саугъагъа берилгенини, алышханыны, пайны тёлегенини, фатар анга ата-анадан къалгъаныны, приватизацияны, сюдню оноуу дегенча документле. Иеликге шагъатлыкъ этген къагъыт тас болгъан эсе, аны копиясын Кадастр палатаны архивинде берликдиле.

Инсан документлени тюзлюклеринде ишекли болуп, аланы кеси аллына тинтирге онг жокъ эсе, Кадастр палатагъа барыргъа боллукъду. Аны специалистле къагъытлада халатла болгъанларын бла къалгъанларын сюзерге болушурукъдула, келишимни тауусурдан алгъа къаллай къагъытда жыйышдырыргъа кереклисин ангылатырыкъдыла.