Дронла: сабанлагъа дарман сепген, урлукъ салгъан да ала

Шёндюгю дунияда дрон деген учуучу затла бек кенг жайыла барадыла. Аланы хауагъа кётюрюп, табийгъат ариулукъланы суратха неда видеогъа тюшюрдюле, аскерде да ол халда неда сауутча алай хайырланадыла. Кёп бёлюмледе бардыла ала, алай эл мюлкде бютюнда аслам бола барадыла. Анда ала сабанлагъа дарманла себедиле, заранлы къурт-къумурсхаланы къырадыла, битимле не халда болгъанларын тинтедиле. Дронла жыйгъан информация жерчиликде тюз оноула этерге болушады.

Битимлени тинтедиле

Дронла сабанланы башлары бла учуп, битимлени суратха аладыла, ызы бла информацияны тинтип, къалайда къаллай чурум болгъанын кёргюзтедиле. Шёндюге дери аллай ишлени спутникле бла этип тургъандыла, алай дрон жыйгъан информация аламдан къарап тинтгенден эсе толу болады. Дагъыда ол бек учуз келеди.

Топуракъ а не халдады?

Эл мюлк дрон сабанны башында учуп, анда тапсыз эмда къургъакълыкъ басхан жерлени олсагъат кёргюзтеди, сууну къалайдан келтирсе иги боллугъун да билдиреди. Дагъыда топуракъда тузланы ёлчемин, саулай къурамын да тинтип, неллай бир эмда къаллай семиртгичле жаяргъа тийишлисин билдиреди. Ол а бары да бай тирлик алыргъа себеплик этеди.

Урлукъ да себедиле

Быллай техника урлукъ себерге да болушады. Шёндю аны асламысында агъачлада хайырланадыла. Дронла адам неда трактор женгил жеталмазлыкъ жерледе терек зыгытла орнатадыла. Сёз ючюн, аллай онусу бир кюннге 400 минг зыгыт салыргъа боллукъдула. Быллай техниканы Biocarbon Engineering компания чыгъарады.

Россейде уа, Чувашияда дронланы картоф салгъанда хайырланып башлагъандыла. Самара областьда уа быллай техника сабанлада битимлени урлукъларын себеди. Бир кереге жыйырма килограмм кётюреди кеси да.

Дарман сепген, къуртланы къыргъан да ала

Дронла сабанлагъа дарман себедиле, бу ишни адамдан эсе терк этедиле. Препаратланы бошуна жайып къоймай, энчи къалайгъа жетдирирге керек эсе да, аны жик-жиги бла тамамлайдыла. Сёз ючюн, Precision AI компанияны учуучу техникасы дарманланы жаланда ауруулу битимлеге себеди. Agras деген дрон а химикатланы бир кюннге 40 гектаргъа жаяды.

Нидерланды къыралда алимле PATS камера къурагъандыла. Ол а дроннга заранлы къумурсхаланы табаргъа болушады. Къубаллеклени аллай тюрлюлерин къанатларын къалай къакъгъанларына кёре таныйды.   

Тирликге да себеплик этедиле

Россейден «Новбиотех» компания чыгъаргъан эл мюлк дрон битимлени ёсюуюн тирилтеди. Ол кече сабанны башында учуп, лазер бла «жарытады» аланы. Аны хайырындан тирликлилик 10-35 процентге кётюрюледи. DJI компанияны Mavic 3 Multispectral аппараты уа битимле къалай ёсгенлерин тинтип, тирликни сакълау эмда кёбейтиу жаны бла хайырлы рекомендацияла береди.

Мюлкледе къоркъуусузлукъгъа къарайдыла

Ферманы неда сабанны узакъ мюйюшлеринде окъуна не зат бола тургъанын кёредиле дронла. Аланы багъалы битимлени къоруулагъанда, сабанланы кийик жаныуарладан неда башха къоркъууладан сакълагъанда хайырланыргъа боллукъду. Бу ишни ала адамдан эсе терк эмда тынгылы этедиле.

Сёз ючюн, Японияда Ниигата регионда DMM Agri Innovation компания къурагъан квадрокоптерни хайырланадыла. Бу аппаратны камерасы тёгерек-башны кече да бек иги кёреди. Ол сабанланы къабанладан къоруулайды. Жаныуарла къалайы бла келгенлерин тинтип, алагъа къапханланы тийишли жерледе салыргъа болушады. Къытайда этилген Mavic 3 Enterprise эм Mavic 3 Thermal дронла уа агъачлада от тюшген жерлени онбеш километр узакъдан окъуна кёредиле.