Регион ононучула бла тюбешгендиле, жарсыуларын да айтхандыла

Кёп болмай СКФО-ну субъектлерини таматалары Шимал Кавказны жаш тёлюсюню «Машук-2019» форумуну келечилери бла тюбешгендиле.  Машукчула алагъа регион жаш тёлю политиканы, экологияны, кир-кипчик бла байламлы реформаны, табийгъат эм архитектура эсгертмелени,  урунууну, билим бериуню эм аскер-патриот ниетде юйретиуню юслеринден  соруула бергендиле. Ол санда энчи тилеклеге да  къаралгъанды.   

Ингушетиядан къауум    бюгюнлюкде  школлада преподавательлени ишлери бла байламлы   бюрократияны айный баргъанын тохтатырча мадарла этилирге кереклисин билдиргендиле.  Правительствону келечилери алгъаракъда  ол проблема педагогланы  битеуроссей жыйылыуларында да кётюрюлгенин, анда устазла  берирге керек отчётланы азайтыргъа кереклиси да сюзюлгенин билдиргендиле. Жууукъ заманда бу жаны  тюрлениуле  болмай жарамазлыгъын да   айтхандыла.

Белгилисича, бюгюнлюкде республикада  педагогланы бла устазланы билимлерин  ёсдюрюуге   аслам эс бурулады, ол себепден   къоншу  регионладан коллегаларын  чакъырырча онгла къураллыкълары да  билдирилгенди. 

Къарачай-Черкес Республиканы майданында уа къырал къуллукъда урунууну магъанасыны юсюнден  айтхандыла. Аны бла байламлы  Правительствону Председатели Аслан Озов жаш адамлагъа эм биринчиден иги билим алыргъа, вуздан сора  урунургъа ашыгъыргъа эмда   жетишимле болдурургъа кюреширге кереклисин эсгергенди.       

Ставропольчуланы да тюрлю-тюрлю кемчиликле  жарсытхандыла, ол санда аскерде къуллукъ этиуден башлап орта-специал  билим берген учреждениялада энчи  оборудованияланы нек жетишмегени. Правительствону Председателини орунбасары Ирина Кувалдина крайда колледжле жангы оборудованияла бла толсунлай жалчытылыннганларын, анга шагъатлыкъ этген шартладан бири уа  жыл сайын WorldSkillsRussia  конкурсда жаш устала биринчи жерлеге тийишли болгъанлай туруучуларын чертгенди.  

Къабарты-Малкъарны келечилери уа репсбуликаны Правительствосуну Председатели  Мусукланы Алийге   кир-кипчик бла байламлы   реформа  узакъ элледе къалай бардырылгъаныны  юсюнден соргъандыла.  Анга экологланы къаууму да   кеслерини оюмларын  билдиргендиле. Алий Тахирович   жаш адамланы къайгъырыуларыны хайырындан   республикада жашиллей кёп жыллагъа сакъланырыгъын белгилеп, ыспас этгенди.  

Андан сора да, республикада жаш адамла кеслерин чыгъармачыкъ жаны бла  ачыкъларча онгла болмагъанын сагъынылгъанды. Машукчуладан бири уа   аны проекти   арт-центр къурау бла байламлы болгъанын да эсгертгенди. Къырал таматала уа  анга болушургъа сёз бергендиле. 

Шимал Осетияны келечилери да  регионну Правительствосуну Председатели Таймураз  Тускаевге   рекламалы транспарантла   Владикавказны ара орамларыны   бетлерин бузгъанларын, ол кемчиликни кетерирча бир мадар этилирге керек болгъанын айтхандыла.  Кертиси бла да,  шахарда онтогъузунчу ёмюрде ишленнген юйле кёпдюле, аланы туристле да бек жаратадыла. Ол себепден болумну игилендирирча ишле узакъгъа созулмай бардырылыргъа тийишлидиле,- дегендиле таматала.  

Курданланы Сулейман.
Поделиться: