Жаш тёлюню айныууна ахшы амалла

Бу кюнледе Элбрус элде Къабарты-Малкъар къырал универститетни окъутуу-илму арасында «Россейни жаш тёлюсю. Адамла жашауларында жерлерин излегенде тюбеген чурумланы кетериу» деген ат бла битеуроссей илму конференция болгъанды. Ол КъМР-ни Жаш тёлюсюню ишлери жаны бла министерствосуну, КъМКъУ-ну, КъМКъАУ-ну эм РАН-ны социология жаны бла илму-тинтиу арасыны себепликлери бла къуралгъанды.

Форум анда сау ыйыкъны бардырылгъанды. Анда кёп магъаналы сорууланы тинтгендиле, анга башха регионладан студентле да къатышхандыла. Ала, бир бирлери бла танышып, мындан ары жашауларында къайда ишлерге сюйгенлерини юсюнден айтып, башха шахарлада да аланы билимлери бла байламлы амалланы тинтгендиле.

 Форумгъа келгенлени санында дагъыда бюгюнлюкде иги жетишимлеге жетген жаш алимле, тинтиу бла кюрешген социологла, экспертле, илму-билим берген араланы келечилери да болгъандыла. Дагъыда жаш адамлагъа докладын окъургъа ФНИСЦ РАН-ны Социология институтуну директору, РАН-ны академиги Михаил Горшков да келгенди. Биринчи кюнден башлап бу жумушха къатышхан алимле студентле бла кёп магъаналы сорууну сюзгендиле.

КъМР-ни жаш тёлюню ишлери жаны бла министри Азамат Люев «Къабарты-Малкъарны шёндюгю жаш тёлюсюню социал сураты» деген докладын окъугъанды. Ол дагъыда жаш адамланы дуниягъа къарамлары жылдан-жылгъа къалай тюрлене баргъаныны юсюнден да айтханды.

Форумда студентледе да бусагъатдагъы жашауну юсюнден кеслерини сагъышларын билдиргендиле. Аланы санында Дондагъы Ростовну Юг федерал университетини «конфликтология» бёлюмюню студенти Данил Киселёв «Цифровизацияны шёндюгю юйюрлени жашауларына келтирген хайыры бла зараны» деген докладында сейир затланы ачыкълагъанды. Кёп юйюрлени бюгюнлюкде болумларын тинтгенин айтып, жангы технологияла адамланы жашауларын женгил этгенин белгилегенди, алай аны осал жаны болгъанын да унутмазгъа чакъыргъанды. Инсанны жашауунда керекли цифралы технологияла саулукъгъа хата келтиргенлерин, алагъа эс да,  заман да кёп бёлюннгени ючюн юйюрлеге заран салыннганын да чертгенди докладчы.

Огъарыда сагъынылгъан институтну студенти София Федорович а «Интернетде жалгъан жашау бла бусагъатдагъы жаш тёлю» деген докладын окъугъанды. Жарсыугъа, докладны темасы бюгюнлюкде бек уллу чурумладан бири болуп баргъанын, жаш адамланы психологияларына заран келтиргенин да чертгенди. Кёпле Интернетде оюнлагъа бир кирселе, заманны унутуп, ол жалгъан жашаудан чыгъалмай къалгъанларын эсгертгенди. Аны ючюн аллай программала бла сакъ болургъа тийишлисин чертгенди.

Дагъыда форумда студентлеге  илму статьяланы къалай жазаргъа кереклисини юсюнден да айтып, мастер-классла да кёргюзтгендиле. Адамланы жашауларында асламлы информация органланы магъаналылыкъларыны юсюнден да сейир затла билдиргендиле.

- Жети кюнню ичинден бардырылгъан форумда жаш тёлюню таза хауада солургъа амаллары болгъанды. Дагъыда узакъ шахарладан келген къонакъланы ариу табийгъатыбыз бла шагъырейлендиргенбиз. Ала хауаны тазалыгъын, тёгерекни тамашалыгъын бек жаратып, быллай сейир жерге келгенлерине къууаннганларын билдиргендиле, - дегенди КъМР-ни жаш тёлю арасыны баш специалисти Атмырзаланы Амина.

Жыйылыуну ахыр ингиринде уа белгили артистле къонакъланы ариу жырлары бла къууандырып, той-оюн этип кёллерин жарытхандыла.

Темуккуланы Амина.
Поделиться: