Жолчуланы байрамы

Жыл сайын октябрь айны ючюнчю ыйых кюнюнде жолла ишлеучюле кеслерини профессионал байрамларын белгилейдиле.

Байрамны тарыхы 1996 жылда башланнганды. Биринчи кезиуде Президентни буйругъу бла ол «Автомобиль транспортда эмда жол мюлкде уруннганланы Кюню» деп алай эди. Артда уа, 2000 жылда, аны жаланда ма бу мюлкде къармашханлагъа атап тюрлендиргендиле.

Жол мюлкню магъанасыны юсюнден айтып турургъа да керек болмаз. Саулай экономиканы эм уллу бёлюмлеринден бириди ол! Ары юч мингден артыкъ учреждение, предприятие, биригиу киредиле, уруннганланы саны уа сегиз жюз мингнге жууукълаша келеди.

Жол мюлкде уруннганланы кюню – ол автомагистральла, кёпюрле, трассала ишлеучюлени, сау жылны ичинде алагъа къараучуланы, автомобиль транспорт бла жюрюу ышаннгылы эмда къоркъуусузлу болурча этиучюлени байрамыды. Къыралны эм магъаналы инфраструктурасындан биридиле жолла.

Жолла болмай Россейни Конституциясында адамланы жер-жерлеге барыу, жюклени ташыу эм кёчюрюу жаны бла эркинлик излемлерин жалчытыргъа амал боллукъ тюйюлдю. Автомобиль жолла социал борчланы, миллет проектлени да тамамлауда магъаналыдыла. Тийишли инфраструктура айныгъанына кёре къыралны къолайлыгъы, кючю да алай болады.

Ахыр жыллада автомашиналаны саны терк кёбейип башлагъаны эсленеди. Аны бла бирге адамланы, жюклени ташыу да айный барады. Россей Федерацияны Транспорт стратегиясында айтылгъаныча, жол сетьни айныуу къыралны социал-экономика айныууна келиширге керекди.

Бюгюнлюкде да ол жаны бла къадар иш этиле барады. «Къоркъуусузлу тынгылы жолла» миллет проект 2018 жылда башланнганды, анга 83 регион эмда 104 агломерация киредиле.

Бизни къыралны жери бек кёпдю, таула, агъачла, кёлле, суу басхан тийреле да асламдыла. Аны ючюн жол ишлеген не заманда да женгил болмагъанды. Алай бу мюлкде уруннганла тири, къармашыулу болгъанлары себепли аллай борчла тамамлана барадыла.

Бюгюнлюкде Россейде жолланы узунлугъу жюз минг километрле бла тергеледи. Ала эллени, шахарланы, регионланы араларында созуладыла, не узакъ жерлеге да жетерге онг бередиле. Хар жыл сайын ишлене баргъан автотрассала эмда кёпюрле уа жашауну андан да женгил эмда къоркъуусузлу эте барадыла.