Казбек Коков къуллукъ борчларын толтура ёлген полициячыланы эсгергенди

КъМР-ни Башчысы Казбек Коков 2005 жылны 13 октябринде республиканы ара шахарына чабыууллукъ этген террористлеге къажау кюрешни кезиуюнде ёлген полициячыланы эсгергенди, деп билдиргендиле КъМР-ни Башчысыны бла Правительствосуну пресс-службасындан.

«Хурметли жерлешлерим! Къабарты-Малкъарда  13 октябрь бушуулу кюнледен бирине саналады. Ол  Къуллукъ борчларын толтура ёлген полициячыланы эсгериуню кюнюдю.

Быллай кюнде биз 18 жыл мындан алгъа болгъан жарсыулу ишлени эсибизге тюшюрмей къалмайбыз. Ол кюн Нальчикге  террористле чапханларында право низамны сакълаучу органларында къуллукъ этген 35 адам, мамыр инсанладан да 14-сю ёлгендиле.

Ол къаугъаланы кезиуюнде жан бергенлеге уллу бушуу этебиз, къолларына сауут алып, республиканы террористледен жанларын аямай къоруулагъанланы жигитликлерине баш урабыз. Аланы атлары эсибизде къаллыкъды.

Ол террорчулукъ къаугъаны къурагъанлагъа бла аланы муратларын толтургъанлагъа кечгинлик жокъду, алагъа налат берилгенлей турлукъду.

Бюгюнлюкде, къыралыбызгъа терроризмге бла экстремизмге къажау сюелирге жангыдан тюшгенде, биз ала бла байламлы ишлени не тюрлюлерине да къаты жууап берирге итиниулюгюбюзде бир ниетли болгъанлай къалабыз. Власть органла, право низамны сакълаучула, жамауат саулайда кючюбюзню бирикдирсек, ол ууну хорлаяллыгъыбызгъа, жангы къоркъуулагъа къаты жууап бераллыгъыбызгъа, Къабарты-Малкъарны халкъына мамыр эмда ырахат жашау бардырыргъа ахшы онгла къураяллыгъыбызгъа ишексизме», деп айтылады КъМР-ни Башчысыны Къабарты-Малкъарны жамауатына чакъырыу сёзюнде.

Поделиться: